Shillong, Risaw 06 : Ka Khasi Hills Autonomous District Council (KHADC) kala pynkhreh ban pyntreikam noh ia ka Digitilization of India Land Record Management Programme, ban buh record ia baroh ki jaka puta bad ka khyndew ka shyiap hapoh ki kor Digital.
Ia kane la pyntip da u Executive Member i/c Land Record Bah Teibor Pathaw hadien ka jingialang ba la pynlong da ka Council bad ki Rangbah Shnong kiba na sor bad khapsor, hynne ka sngi Thohdieng ha Pinewood Hotel.
U Bah Teibor Pathar u pyntip ba ka jingpyntreikam ia ka Digitilization of India Land Record Management Programme, ka dei ka jingbthah bad bei tyngka da ka Sorkar Pdeng.
Haba pyntip ba kane ka sienjam kan ym ktah satia ia ka rukom bat khyndew, u EM ula ong “Ki paidbah kim dei ban sngewthuh bakla, ka jingthmu hi ka long tang ban buh record ia ka jinglongtrai ia ki jaka puta”.
U Bah Teibor ula pyntip ba ka Council ka kyrmen ban pyntreikam noh ia kane ka prokram ha u Naiwieng ne Nohprah mynta u snem khnang ba kan pynsuk ia ki paidbah, ki shnong ki thaw bad ki Hima ba kin tip ia ka hok longtrai halor ka khyndew ka shyiap, ka ban tehlakam ruh ia ka jingiaknieh jaka, jingiadie iathied jaka kulmar bad kiwei kiwei.
Ka KHADC kala lum ia kane ka jingialang jong ki Rangbah Shnong ban pynshai ia ki nongialam shnong ia ki Ain jong ka Council kiba la ioh jingmynjur ba kynthup ia ka Khasi Hills Atonomous District (Regulation and Administration of Land) Act 2021, ka Khasi Hills Autonomous District (Solid Waste Management) Act 2020 bad ka jingpynkhamti iaka bor ban ai iaka Building Permission lyngba ka Building Byelaws ha ki Schedule Area kiba la khmih da ka District Council.
“Ka long kaba kongsan ban ai jingpynshai ia ki Nongialam Shnong namar ha kine ki Ain (Land Act, Building Byelaws bad Solid Waste Management), la kynthup lang ruh ia ki Nongialam Shnong bad ki Dorbar Shnong” ong u Bah Teibor.
Halor ka Building Byelaws, u Deputy CEM Bah Pynshngain N Syiem ula ong ba ka KHADC kala ioh bor ban ai ia ki Building Permission na ka bynta ban trei ia ki iing hapoh u pud u sam ka Council kiba don shabar ka Municipal.
“Ngi hap ban pynshai ia ki Nongialam Shnong ba kin kyntu ia ki paidbah ba kin wan mih sha ka Council ban shim jingbit haba thmu shna iing” ula ong.
Halor ka Solid Waste Management, u DyCEM ula pynshai ba ha manla ki shnong, kin sa don noh ki Solid Waste Management Committee kumjuh ruh ha ki Hima khnang ba kan don ka jingiatreilang hapdeng ka Council, ki Hima bad ki Shnong ban pynneh ia ka jingkhuid jingsuba.
