Shillong Risaw 06: U Symbud Myntri Rangbah ka jylla Bah Prestone Tynsong, hynne ka sngi Thohdieng, ula pyntip ba ki don haduh 36 ngut ki nong Meghalaya kila sahkut ha ka North Sikkim na ka jingshlei um kynsan kynsan ha Wah Teesta na ka jingbthei ka pung thah Lhonak kaba don ha North Sikkim.
“Ngi la ioh jingtip ba ki don haduh 36 ngut ki nong Meghalaya kiba sahkut ha North Sikkim bad kine baroh ki don ha ka jaka kaba shngain” ong u Bah Prestone.
“Ngi la aibor ha u Additional Chief Secretary ka jylla Dr P Shakeel Ahmed ban iakren bad u Chief Secretary ka Sikkim ha ka ban pynthikna ba kine ki nong Meghalaya kin ioh ia baroh ki jingiarap ba ki donkam” ula bynrap.
Kat kum ka jingong u Bah Prestone, kine ki 36 ngut ki dei kiba na Smit, na Ri-lum Jaintia, West Khasi Hills bad kiwei kiwei nalor ki 4 ngut kiba dei ki Mizo bad ki Naga.
“Kine baroh kila don ha ka jaka kaba shngain bad ka jingbym ioh lad jong ki ban mih na North Sikkim ka dei namar ka jing dkut ka jingkieng bad ka jingjulor jong ka surok kaba la pyndkut ia ka leit ka wan” ula ong.
U Bah Prestone u pyntip ba ka Sorkar Jylla kala dep iakren bad ka Sorkar Sikkim ba kan pynpoi noh ia kine ki 36 ngut hapoh Gangtok mynta ka miet bad nangne pat ban pynpoi sha Siliguri. “Ka Sikkim kala ai jingmynjur ban pynpoi ia kine ki nong Meghalaya haduh Siliguri” ula ong.
U Bah Prestone u pyntip ba la bthah ia u Shakeel Ahmed ba un leh ia kaba donkam wat ban pynbiang ia ki kali ban leit shaw ia ki na Siliguri ba kin poi noh sha Jylla.
