Jam ka jingiakhih ka NGEA sha ka sngi ba 34 namar ka tulop | Sahkut lut ki kam ha GHADC

Shillong, Nailar 11: Ka jingiakhih jong seng Non-Gazetted Employees Association (NGEA) jong ka Garo Hills Autonomous District Council (GHADC) kala jam mynta shaka sngi kaba 34 jong ka jingiakhih ïa kaba la pynlong ia ka ophis ka GHADC naduh 7 tarik Naitung.

Palat 500 ngut ki nongtrei ki la ïalum hajan ka jaka jong ka GHADC ban dawa naki bor synshar ka GHADC ban pyllait noh ïa ka tulop kaba dang sahteng haduh 43 bnai.

Ha kane ka jingïakhih la wan kyrshan ruh daka A’chik State People’s Front (ASPF) ha kaba ka la kular ban kyrshan pura ïa kane ka jingïakhih bad ki nongialam jong ka ASPF ki la pynthikna ia ki nongtrei ka GHADC ba kin ieng lang bad ki haduh ban da pynbeit ia katei ka jingeh.

U President ka NGEA u Brithen M Sangma uba la pyniaid ia kane ka jingialang u la kynthoh ia ka jingsngap jar jong ki bor synshar ka GHADC naduh u Chief Executive Member (CEM), Deputy CEM bad ka Executive Committee (EC).

“Ka la iaid mynta shibnai saw sngi hynrei ym pat don mano mano na ka bor synshar ka GHADC ba wan bad ban kylli shaphang ki jingeh jong ngi. Ngi dawa tang ïa ka bainong kaba dei hok jong ngi kata ka tulop kaba 43 bnai. Lada kane ka dang ïai bteng, ngi la pynkhreh ban khang ïa ka ophis jong ka GHADC” u la maham.

U Brithen u la ong ba ha kaba sdang ki nongtrei ka GHADC ki la dawa ban pyllait shwa ia ka tulop kaba ym duna ia ka shisnem hynrei mynta ki la ïeng skhem ban leit trei baing satang dalai oh lut ka tulop kaba pura kata baroh 43 bnai.

Ha kane ka jingiakhih la iohsngew ruh ia ki kyntien dawa ban hiar shuki noh ia ki heh Ophisar ka GHADC naduh u CEM u Albinus R Marak, Dy CEM u Nikman Ch Marak, bad u EM ka pla tyngka u Linekar K Sangma.

Haba pynpaw ïa ka jingkynnoh ba la pyndonkam bakla ïa ka pisa, ka Timtim N Sangma ka la ïathuh ba ka GHADC ka la ïoh T.142 klur katba T.134 klur kadei ka bhah jong marpoh khyndew hapdeng u snem 2021 bad 2024 bad baroh ka pisa ka long T.276 klur ha ka por jong ka EC ka ba mynta.

Haka jingïalang ka Timtim kala pynshai ruh ba ka jingdon ki nongtrei hapoh GHADC mynta ka long 1,376, kaba hiar na ka 1,600 ha u snem 2020.

Ka la kynnoh ruh ba ki don ki jingleh bymsuidniew ha ka tnat Tourism ha kaba ki don ki nongtrei muster roll kiba ïoh ïa ka jingmyntoi na ka 5th Pay Commission khlem da don jingmang iaka kam.

Haba pynkynmaw ïa ka jingïalang bad u Myntri Rangbah ka Jylla ha u snem 2023, ka Timtim kala ong ba u Myntri Rangbah ula kam baka Sorkar ka la dep siew palat T.120 klur sha ka GHADC ha kaba donkam T.6 klur man u bnai na ka bynta ka tulop. “Nga la ong ia u ba hapoh ka 4th Pay Commission, donkam tang T.4 klur ban siew tulop hynrei u Myntri Rangbah ula leh hi ia ka jingkhein bad u la ong ba ka tulop jong ngi ka la dep pynkhuid” ka la ialap haka jingïalang.

“Kane kam dei ka kam sain pyrthei, ka dei shaphang ka hok jong ngi ban ioh tulop. Ka jingkitkhlieh ka shong ha ki nongialam jong ka Council, khlem da khein ia ka seng. Ka dei ka jinglong kaba sngewlehrain” ka la bynrap.

Naka liang u Brithen Sangma u la ther tyngeh ruh ia ka EC ka GHADC kaba la pynmih ia ka show-cause notice iaka Timtim Sangma hadien ba ka la pynpaw paidbah ia ki jingtip ba bniah halor ka pisa tyngka.

U Brithen ula maham ba lada ym lah ban weng noh ia katei ka Show Cause Notice, ka lah ban pynmih biang ia ka jingïakhih kaba jur.

Namar haduh mynta kam pat don kano kano ka jingphah ktien ka GHADC ne ka Sorkar, ka NGEA ka la pynbna ban bteng ïa ka jingïakhih khlem pud sngi tad haduh ban da pyllait ïa ki tulop kiba dang sahteng.