Jah syndet ki Nongialam ka TUR bad CSWO na ka jingtohkit halor ki jingkynnoh jyrsieh khaii khaw

Dawa panmap u Myntri na ka Kong Patricia ba kynthoh jhulum

Shillong, Jylliew 09 : U Myntri ka Tnad Social Welfare Bah Paul Lyngdoh hynne ka sngi Thohdieng, ula sei madan ba ki lai ngut ki Nongialam ka Thma u Rangli (TUR) bad CSWO kila shu jah syndet na ka jingtohkit jong ka Independent Inquiry Commission ban pynksan ia ki jingkynnoh ba ka don ka jyrsieh khaii tuh ia u khaw ka Tnad ICDS ka Jylla.

Kine ki lai ngut ki Nongialam Sengbhalang ki dei ka Kong Angela Rngad, u Kurim jong ka Tarun Bhartya bad ka Kong Agnes Kharshiing.

Kat kum ka jingiathuh u Bah Paul, kine ki laingut kila leit mih hakhmat ka Commission bad kila sei ia shibun ki jingkynnoh pyrshah ia ka kompani M/s Continental Milkose haba pynpaw ruh ba kin sa ai ia ki jubab pynksan ba bniah halor kane ka kam hapoh ka10 sngi naduh ka sngi ba ki leit mih hakhmat ka Commission.

“Hynrei, (ka Commission kala ong) palat la 4 bnai shiteng kala iaid hynrei kam shym la don satia kata ka jubab pynksan bala ioh pdiang na baroh lai ngut. Namar ka jingbym don ki kot ki sla ba kyrshan, baroh ki jingkynnoh jong ki la shem ba ki long ki bym don nongrim bad ym lah satia ban pynieng nongrim” ula ong.

“Ka dei ruh hadien ba kala poi sha u (AG) bad ula ai ia ka kaiphod ba ka jingkynnoh kam don nongrim bad u Myntri ba dei khmih, ula pynkut noh ia ka lynnong jong kane ka kam haba pynshong nongrim na ka kaiphod jingtohkit”” ula bynrap.

U Bah Paul ula ong, nalor ka jingleit tohkit (ka Commission) ha kylleng ki jaka, nalor ka jingplie ia baroh ki riew paidbah ban wan ai sakhi, nalor ba ki (Commission) kila aiti ia ka kaiphod ba bniah hadien 8-9bnai ka jingtohkit, ka Sorkar kam don eiei shuh ban ong lait noh tang ban pdiang ia ka kaiphod nalor ba ka kompani ba shah kynnoh ruh, kala byrngem ban leit mudui pyrshah ia ka Sorkar sha Iingkashari namar ka jingpynsangeh ia ka jingtreikam jong ka ha ka por ba don ka jingtohkit.

U Bah Paul Lyngdoh ula sei ia kane, haba pynshai ia ka jingkynthoh jong ka Kong Patricia Mukhim ha ka article ba ong ba u (Paul) u iada iala u jong ki para MLA ka UDP, uba dei u Myntri ba khmih ia ka Tnad, da kaba sei paidbah ia ki jingshem jong ka kaiphod jingtohkit kaba pynkut ba ka jingkynnoh jyrsieh khaw ka dei ka bym don nongrim.

U Bah Paul ula iathuh ba ka kaiphod jong ka jingtohkit halor ka kam ka jingpyllait ia u khaw bad Supplementary Nutrition Program (SNP) hapoh ka Integrated Child Development Scheme (ICDS) bala khlieh da u Justice (Retd) Mool Chand Garh, kala aiti ia ka kaiphod jingshem kaba shai kdar ba pynpaw ba ki jingkynnoh pyrshah ia ka M/s Continental Milkose ki dei ki bym don nongrim.

U pyntip ba ka Commission kala pynlut haduh 10 bnai ban tohkit ia kane ka jingkynnoh jyrsieh hadien ba ki Pulit ka Assam kila ioh kurup ia 1 lak byrni u khaw ba 50 kg shi byrni na kawei ka kudan ha u snem 2021.

U Bah Paul ula ong ba ka Article bala thoh da ka Kong Patricia Mukhim ka dei kaba pynjah burom bad ka dei kaba thmu ban kynthah beit beit ia u shimet da kaba kynnoh ba ula leh ia kane kum u briew ka UDP ban iada ia u Myntri barim ka Tnad bad baki paidbah ki dei ban pule ia baroh ka kaiphod namar ka jyrsieh ka dei na ka pisa u paidbah.

“(Hynrei) nga kyntu jur ia ka (Patricia) ban pule shuwa ia ka kaiphid shuwa ban pyniasnoh ia kane ka kam sha ka UDP, sha u Bah Paul bad u bah Kyrmen Shylla. Ka jingtohkit ka dei kaba la khlieh da u Judge” ong u Bah Paul haba ban jur ruh ba ka kong Patricia ka dei ban pan map.

“Hooid ka (Patricia) dei ban panmap hakhmat u paidbah namar kane ka jingkynnoh naba kane ka dei ka Committee kaba la pynbna paidbah, kaba la leit, leh ia ka kamram bad ka I kumba buh jingkylli ia ka jingtrei hok jong u Justice Mool Chand Garh” ula bynrap.