Nongstoiñ, Risaw 20: U wei u rangbah briew ba la 43 snem ka rta ba la tip kyrteng kum u Phyrnailin Nongrem napoh ka shnong Mawkhlam-Nongpyndeng, u la jah na la iing naduh ka 13 tarik u Risaw 2025 bad haduh mynta u khlem wanphai iing shuh.
Katkum ka ejahar ba la ujor ha Nongstoin Police Station, la ong ba utei u rangbah u la jah na la ïing naduh ka janmiet 13 tarik bad haduh mynta u khlem wanphai shuh sha iing bad ym shym la don ba iohi shano bad badno u leit.
Kiba ha iing ki la pyrshang ban leit wad kylleng ki jaka kiba u ju smat ban leit bad ki la kylli ruh na ki lok ki jor kiba u kham iajan hynrei ym shym la don satia ba iohi ne lap sabud ia u, bad kane ka la pynshaiong ngain̈ ia ka ïing ka sem hi baroh kawei.
Kumta, kiba ha iing ki la pyntip noh ia katei ka kam sha ki bor pulit bad ki bor shnong bad kiba ha iing mynta ki dang bteng ban leit wad sa sha ki khlaw ki btap bad ki lum ki wah kiba u ju kham sngewtynnad ban leit.
Na ka liang ki pulit ruh ki la iathuh ba kin sa shim ia la ka jong ka bynta ban wad jingtip halor ka jingjah jong utei u rangbah bad la kyntu ruh ia kino kino kiba iohi ne lap ba kin sngewbha ban pyntip sha police Control Room ha u number 9366498499 lane phone sha kiba ha iing hasem ha u number 9774296991, 7005938801.
