Shillong, Naitung 25 : Ka Iingkashari Meghalaya High Court, kala bthah ia ka Sorkar Jylla ban leh eiei bad tynrong ia ka jingkitkhlieh ha ki briew ne ki Nongtrei Sorkar ba hapoh ka jingkhmih jong ki, bunbah u dewiong ula shu jah rngai na Rajaju bad shnong Diengngan nalor ban wad ruh ia ki briew kiba kit beain ia une u dewiong.
Ka Iingkashari kala pynmih ia kane ka hukum haba shong bishar ia ka 31st Interim Report bala aiti da ka Justice BP Katakey Committee.
Ka kaiphod ka ong ba kat kum ka kaiphod jingjurupu Deputy Commissioner, tang 2.50 metric ton u dewiong la shem ha shnong Diengngan, na ka 1839.03 metric ton bala lum jingkhein da ka Meghalaya Basin Development Authority (MBDA).
Kumjuh ruh ha shnong Rajaju, kmba 8 metric ton u dewiong la shem na ka 2121.62 metric ton bala lum jingkhein da ka MBDA.
Ka Division Bench ba kynthup ia u Justice HS Thangkhiew bad Justice W Diengdoh kala shim ba u dewiong bala buh jing kylli u dei uba tih beain, bad la paw ba ki don ki briew kiba la kit bad shalan ia une u dewiong wat hapdeng ka jingioh bat.
“Ki bor Sorkar ki dei ban leh eiei mardor halor kane ka kam bad ban tynrong ia ka jingkitkhlieh ha ki briew lane ki nongtrei Sorkar kiba hapoh ka jingkhmih jong ki, la shah ban kit ia une u dewiong nalor ban wad ruh ia ki briew kiba la kit beain ia une u dewiong” bthah ka Iingkashari ha ka hukum bala pynmih hadien ba bishar ia ka PIL ha ka sngi Palei (24 Naitung).
Ka Iingkashari kala bthah ia ki liang Sorkar ba shah mudui ba kin pyntip ia ki sienjam bala shim halor ka aplikeshon bala ai da ki briew ba kam ba ki khlem kynthup lang ia u dewiong jongki bala don lypa ha ka survey ba pynlong da ka M/s Garuda, kynthup ka jingregister case lane ujor ia ka ejahar kat kum ka MMDR Act, 1957.
Haba iadei bad ka aplikeshon jong ki briew ba kam ba khlem kynthup lang ia u dewiong jong ki ha ka survey ka M/s garuda, ka Committee kala pyntip ba ka jingkam jong uwei u briew ka dei kaba shisha bad na ki 21 tylli ki aplikeshon, u dewiong jong uwei u briew um shym la don satia ha ka thup bala lum jingkhein, u dewiong jong ki 6 ngut ki briew u khlem shah kynthup lang ha ka affidavit bala aiti hakhmat ka Iingkashari Supreme Court bad u dewiong jong ki 14 ngut ki briew, watla la kynthup lang ha ka stock ba la lum jingkhein thymmai, ka survey ka khlem lap satia ia ki ha ki jaka bala ai.
“Haba bishar ia kine ki jingshem, ki bor Sorkar ba long liang mamla ha ka mukotduma, ki dei ban pyntip ia kaei ka kam ba kila leh haba iadei bad u dewiong jong kine ki 21 ngut kiba buh aplikeshon, la kano kano ka police case la register ne em pyrshah ia kine ki briew lane la kano kano ka ejahar la ujor da u Ophisar bala ioh bor hapoh ka MMDR Act, 1957, bad lada lah dep, kaei ka jingmih na kane” bthah ka Iingkashari.
Ha kajuh ka por, ka Iingkashari kala bthah ia ka Sorkar Jylla ban pynkloi noh ia ka jingdie ia u dewiong bala dep lum jingkhein bad dep pynshisha thymmai, uba shu sah hapoh ki depot jong ka Coal India Limited (CIL).
Ka Iingkashari kala shem ba kila don ki jingialang bala pynlong bad ki tnad ba dei khmih, kynthup ka Coal India Limited (CIL), ban ia ai jingmut shuh shuh kiba kham biang bad ki lynti ba lah ban shaniah ha ka jingpynkloi ia ka jinglilamia u dewiong ba dang sah, uba lah dep ban lum jingkhein bad dep pynshisha thymmai.
Ka CIL kala tyrwa ia saw tylli ki jingai jingmut bad u Chairman ka Independent Committee of Coal Auction ula tyrwa ia lai tylli ki jingai jingmut, ha kaba katto katne tylli la dep ban pynrung ha ka Revised Comprehensive Plan, 2022.
Lah buh ruh ia ka jingai jingmut ban pynlong ia ka jingialang bad ki karkhana ba pyndonkam dewiong ha ka Jylla khnang ban pynshlur ia ki ba kin iashimbynta ha ka jinglilam bad ruh ban ai ia ka dor ba kham jem sha ki karkhana, kiba lah ban thied bun.
Na ka liang ki bor Sorkar ba long liang mamla kila pyntip ba la dep ban ujor ejahar halor ka jingtih beain ia u dewiong ha South Garo Hills bad ka jingjah u dewiong ha shnong Rajaju bad Diengngan.
Ka kaiphod ka pyni ruh ba ki bor Sorkar kila kurup ia u dewiong uba shem shabar jong ki depot bala ithuh da ka Sorkar ha Ri-lum Jaintia bad lah dep ruh ban pynlong ia ka jingjurip. La ong ba ka jingbym iahap ki challan bad ki nombor kali jong ki trok ki dei ki daw bah ba wanrah ia ka jingsniew jong ki trok ha ki surok.
Kila pyntip ruh ba ka jingleh audit ia ki karkhana coke ka dang iaid shakhmat bad ia ki jingshem yn sa wanrah hakhmat ka Iingkashari ha ka sien shong bishar ban wan.
Ka Iingkashari kala buh ban shong bishar biang ia kane ka mukotduma ha ka 25 tarik Nailar, 2025 ban ioh pynmih shuh shuh ia ki hukum haba bthah ia ka Sorkar Jylla ba kan aiti ia ka kaiphod halor ki kam ba kala leh halor kine ki jingshen.
