Shillong, Nailar 17 : Ka Justice BP Katakey Committee ha ka 39th Interim Report kala pynpaw ia ka jingjah rngai u dewiong ba kot haduh 28,369 MT na ki depot bala ithuh ka Sorkar ha kylleng ka Jylla bad bthah ia ka Tnad Mining & Geology bad ka Directorate of Mineral Resources ba kin batai ia kane ka jingduna.
Kat kum ka jingleit pynshisha markhmat da ka Committee, ka jingdoh baroh lang jong u dewiong bala shim jingkhein thymmai/pynshisha thymmai ha baroh ki depot bala buh, ki depot ba shipor bad kiba thymmai ka kot ia ka 4,15,788.556MT.
Kane ka kynthup ia 1,03,318.56 MT ha ki depot bala buh da ka Sorkar, 2,91,066 MT ha ki depot ba shipor bad 21,404 MT ha ki depot bala buh thymmai. Ka kaiphod ka pynpaw ba kane ka jingkhein ka dei ban long 4,44,158 MT.
Ka Committee kala ioh ia kane ka jingkhein da kaba bynrap sa 3,72,908 MT u dewiong bala lilam ha ka 28/04/2026 da ka MSTC bad 71,250 MT bala kit da kiba ioh thied na ki lilam ba hashuwa ia kiba la pynjlan por bad ba dang treikam.
Ia u dewiong ba 71,250 MT la buh ha ki 2 tylli ki depot ba shipor – 15,190 MT ha Moo Pynieng, 3 Kilo surok Sutnga ha East Jaintia Hills bad 56,060 MT ha Madan Kyor Pailang, 4 Kilo surok Sutnga.
“Hynrei ka jingkhein bala ai da ka Tnad Mining & Geology ka pyni ba ka jingdon u dewiong ka long 4,15,788.56 MT ha ki depot bala buh da ka Sorkar, ia kaba 28,369.44 MT u duna n aka 4,44,158 MT uba dei ban don ha ki depot bala buh da ka Sorkar” ong a Committee.
“Ka Tnad Mining & Geology bad kumjuh ruh ka DMR, kin hap ban batai ba kumno u dewiong u duna haduh 28,369 MT ha kine ki depot bala buh da ka Sorkar”.
Ka Committee kala pynsngew ruh ia ki lai tylli ki depot ki bym shym la treikam naduh ba plie ia ki- Depot No 1 ha 1 Kilo surok Sutnga, East Jaintia Hills, Drpot No 5 ha Kongjong, East Jaintia Hills bad Depot No.8 ha Nongpyndeng, Nongstoin, West Khasi Hills.
Ka jingshimti ia kine ki jaka na ka bynta kine ki depot ym pat shym la aiti pat sha ki trai jaka.
La bthah ia ka Sorkar ban shim rai la kine ki depot ba thymmai ki dang donkam ne em ban buh, bad ban aiti noh ia ka jaka sha ki trai khnang ban lait ka jingsiew bai wai na ka pla tyngka ka Jylla.
Napdeng kiwei pat ki depot bala buh da ka Sorkar, kaba bun stock eh ka dei ha Pynthorsale ha East Jaintia Hills kaba don haduh 39,370 MT, bud sa ka Tyrkap, Diengshynrum da 17,138 MT bad Pathargittim ha South Garo Hills da 16,736 MT.
