Nongstoin, Naiwieng 22: U Superintendent of Police, West Khasi Hills District, u la pyntip ia ka jingjah rngai jong iwei I Nonghikai skul ha Songsak, iba la jah naduh ka 2 tarik Naiwieng katba I dang leit sha skul.
Ine I Nonghikai I dei I Kong Laidina Rongrin, 27 snem karta,Khun jong I Kong Lucy Rongrin, ba shong ba sah ha ka shnong Doronggre bad iba hikai ha ka skul Holy Spirit School (Songsak).
I Kong Laidina Rongrin I long iba lieh ka sniehdoh, I dei na ka jaitbynriew Khasi hynrei I sngewthuh ruh ia ka ktien Garo bad Hindi, I don ia u sniuh uba kdor lyngkot bad tah rong ktieh bad ka ryngieng jong I ka long 5 phut ka jing jrong. I phong ia ka sopti Salwar kaba rong stem kaba kynthup ia ka patlun bad ka sopti poh.
Halor kane, U Superintendent of Police, West Khasi Hills District,u la pynmih ia ka jingpyntip na ka bynta ban wad ia I Kong Laidina Rongrin, bad lada don kino kino kiba iohi ne kiba ioh jingtip shaphang jong I, kin sngewbha ban pyntip sha ki Police Station kiba hajan eh jong ki bad na ka liang jong U Superintendent of Police, West Khasi Hills District, u la dep ruh ban pyntip sha baroh ki Police Stations jong ka Meghalaya bad ki Jylla kiba marjan na ka bynta ban wad ia I Kong Laidina Rongrin.
