Imphal, Risaw 26: Arngut ki longkmie la ong ba kila jah rngai noh hadien ba kila shah rah ha ka umsaw kaba khlain katba ki dang pyrshang ban jam lyngba sha shiliang jong ka wahduid Thliru hajan ka wah Challou hapoh ka shnong Poi, kumba 160 km na ka nongbah Imphal ka Manipur.
Kane ka jingjia ba sniewbok kala jia hynnin ka jan miet sngi ba Ar ha ka por kumba 4:30 jan miet hapoh Chingai Sub Division jong ka Unkhrul District, kata hadien ka jinghap slap kaba khlem sangeh hapoh ka district.
Katkum ki khubor ba la ioh lyngba ki lad pathai khubor la ong ba kine ki longkmie kila shah rah noh ha ka um katba ki dang pyrshang ban jan lyngba ia ka bynta jong ka wahduid ban leitphai sha la iing hadien ba kila wanphai na ki pyntha kba.
Ia kine ki longkmie kiba la jah rngai la tip kyrteng kum ka Ngamreila, 30 bad ka Ramreila, 34 snem rta kiba dei na ka shnong Poi.Ki nongshong shnong kane ka shnong kumjuh na Wahong, Tusom, Chingai Kuingai, Junlou, Sorapung bad Jessammi kila iashim bynta ha kaba leit wad ia kine ki longkmie kiba jah rngai ha ki rud jong ka wah Challou.
Kumjuh katkum ki khubor la iathuh ba ym shym la don satia kano kano ka jingkieng ka ban pyniasoh nalor jong katei ka wah kaba pyniasoh bad katei ka shnong.
Lah ban kdew ba ki nongshong shnong jong kane ka shnong Poi kila leit sha ki bor sorkar ban kyrpad na ka bynta ban shna ia ka jingkieng halor jong katei ka wah Challou kaba pyniasoh ia ka shnong jong ki mynta la bun bun snem, hynrei na ka liang ki bor sorkar kim shym la shah shkor ia kane ka jingud jingnam ka jong ki kat haduh mynta.
Na ka liang u MLA barim uba dei ruh u Symbud Lamphang u MK Preshow Shimray ula phah ia ka shithi sha u Myntri Rangbah ka Manipur bad sha u DC ka Ukhrul district ha kaba iadei bad kane ka jingjia ba sngewsih bad ban pynpaw ruh halor ki jingeh jong ki nongshong shnong jong katei ka shnong.
