Shillong, Jymmang 14 : U Myntri Rangbah ka Jylla Conrad K Sangma, uba la pyni ia ka jingieid bad jingsngewtynnad ban ialehkai cricket ialade, hynne ka sngi Balang, ula aiti ia ki tiar ialehkai cricket sha ki kynhun ialehkai cricket bapher bapher ka thain Upper Shillong.
U Myntri Rangbah ula sam ia kine ki tiar ialehkai cricket ha ka jingleit iuhkjat ha ka sien ba nyngkongeh ha Sanmer, Upper Shillong ban iashimbynta ha ka jingialang bala pynlong da ka Sanmer Sports, Social and Cultural Club.
Ha kane ka jingialang, u CM ula aiti ia ki tiar ialehkai cricket sha kine ki kynhun :-
* Sanmer Cricket Team
* Sawmer Cricket Team
* ½ Cricket Team
* Mawklot Cricket Team
* Umlyngka Cricket Team
Kane ka jingleit ai jingiarap u CM ka dei kaba la wan jia hadien ka jingiakynduh dang shen ia ki samla kiba dang ialehkai cricket ha ka jingleit iaid kjat (trekking) hapoh ka thain. Haba iohi ia ka jingieid jong ngi ia ka jingialehkai bad ka jingiohi ba ki donkam ia ki tiar kiba kham bha, u CM ula kular ban ai jingiarap, kaba lam sha kane ka jingleit sam ia kine ki tiar.
Haba ai jingkren ha ka jingialang, u Myntri Rangbah ula ban jur ia ka jingkongsan ban saindur ia ki samla bad ai ha ki ia ki lad ki lynti ba kin tyngshain ha ki kam ialehkai bad ka put ka tem ka rwai ka siaw. Ym don satia kaei kaei kaba ai pyn sngewhun ïa nga kham palat ban ïa kaba ïohi ïa ka sap bad ka jingsngewtynnat ha ki samla jong ngi,” u la pynpaw, da kaba pynpaw ïa ka jingangnud jong ka sorkar ban thaw ïa ki rynsan na ka bynta ka jingkiew jong ki samla.
U Myntri Rangbah ula pynbna ruh ia ki katto katne ki kam kiban sa leh na ka bynta ki nongshongshnong ka Sanmer. Kine ki kynthup ia ka jingbei tyngka ia ka PA System, ka jingiarap pisa ia ka Sanmer Sports & Cultural Club bad ka jingkular ban kyrshan ia ka jingtei jong ka Iingdorbar Shnong bad ka topum.
U Bah Daniel Thangkhiew, Political Secretary u Myntri Rangbah, haba ai khublei ia ka jinglong nongialam u Myntri Rangbah bad ka jingpynlut por jong u ban leit iakynduh ia ki paidbah ha kylleng ka Jylla bad ban leh eiei ruh halor ki jingdonkam jong ki, ula kren halor ki rukom treikam jong u Myntri Rangbah bad ka jinglong ba kloi ban leit sha ki bynta bapher bapher jong ka Jylla Meghalaya ban sngewthuh bad pynbeit ia ki jingeh bala mad da ki shnong ki thaw.
U Bah Daniel ula kdew ruh ia ka jingiarap song pisa jong u Myntri Rangbah sha ki hospital ba pyniaid da ki mission kum ka nuksa ia ka jingshimkhia jong u na ka bynta ka bha ka miat jong ki paidbah.
Kiba la iadonlang ha kane ka sngi ki kynthup ia ki nongialam shong ka thain, ki dkhot ka dorbar shnong Sanmer bad ki nongshongshnong.
