Shillong, Naitung 04 : Ka Sorkar Jylla kala ithuh ia bun ki jaka ha sor Shillong ban pynieng kali harud surok bad ruh ki jaka ki bym shah pynieng kali nalor ka jingpynbna ia ka dor ban lum ia ka bai pynieng kali, ka ban treikam naduh ka 1 tarik Nailar.
Kane ka sienjam ka dei shibynta na ka jingpyrshang jong ka Sorkar ban weng iaka jingkhapngiah ka sor bad ban pyrrkhing ia ka jingpynieng kali kulmar kat shaba lap ba shem.
Kane ka jingpynbna kan treikam ha kylleng ki thain kiba hap hapoh ki Traffic Branch bapher bapher ba kynthup ia ka Sadar, Madanrting, Laban, Mawlai, Rynjah, Lumdiengjri bad Laitumkhrah.
Kane kala mih hadien ba ka Tnad Urban Affairs kala pynmih ia ka Meghalaya Parking Policy for Urban Areas, 2025. Kane ka policy kala batai bniah ia ki jingteh kyndon bad rukom pyniaid ia ki jaka pynieng kali ha ki jaka sor na ka bynta ka jing weng ia ka jingkhapngiah ka sor Shillong.
Ka jingpynbna ba la pynmih da u Commissioner & Secretary ka tnad Urban Affairs Dr Vijay Kumar ha ka 26 tarik Jylliew, ka ong ba ka dor bai pynieng kali ha ka shikynta kan long T.20 ia ki kali arshaka bad T.40 ia ki saw shaka ha ki surok ba don ki jaka iew (commercial area) bad T.15 ia ki ar shaka bad T.30 ia ki saw shaka ha ki jaka ki bym don jaka iew (non-commercial area).
Ka Tnad kala thaw ruh ia hynniew tylli ki Zonal Task Force bala khlieh da ki Additional District Magistrate na ka bynta ban khmih bad peit ia ka rukom pynieng kali.
Ha ryngkat ka jingiasyllok bad ka Tnad Public Works Department (PWD) bad ki Dorbar Shnong, ki Zonal Task Force kila dep ithuh ia ki jaka kiba iahap ban pynieng kali harud surok.
Ka jingpynbna ka ong ba k por naduh ka sngi ba pynmih ia ka jingpynbna tad haduh ka 1 tarik Nailar, yn pyndonkam da ka Tnad bad ki Zonal Task Force ba kin nang pynbeit ryntih ia ki kyndon ban lum bai pynieng kali bad ban iasam ia ka jingmih.
“Kino kino ki jinglum khlem da iohbor lane iaid lait na ka dor bala buh, kan khring ia ki jingpynshitom kat kum ki kyndon ain” kala maham.
Ka Tnad kan sa shongbishar thymmai ia kai bai pynieng kali na ka por sha ka por.
Kane ka jingpynbna kan treikam tad haduh da pynmih da kawei pat ka hukum.
