Shillong, Nailur 02 : Ka BJP kala phaikhmat sha ka Sorkar ban lamkhmat ka BJP ha u 2028 da ka jingithuh lypa ia 25-30 tylli ki seat ba ka lah ban jop bad ia ka dur u Myntri Rangbah yn sa shim rai kat kum ka jingdon slem ha ka party, ong u Nongialam ka BJP bad MLA ka Pynthorumkhrah Bah AL Hek ha ka sngi Ba-ar.
Haba kren sha ki nongthoh khubor, u Bah Hek u iathuh ba ki kam kila iaid shaid shaid ha ki shnong ki thaw naduh ki Booth haduh ki district.
“Ngi la dep ithuh ia ki seat ba kongsan hynrei mynta ngi donkam tang ia u kyrtong ba lah ban ioh ia ka jingjop. Ngi dang leh survey mynta” ula ong.
Kat kum ka jingong u Bah Hek, ka thup ka kynthup ia ki constituency ha baroh lai tylli ki thain ka Jylla. U ong ba ka jingjop kan sdang eh ha ka jingjied ia ki kyrtong haba pynpaw ba ka BJP ka long kaba kloi ban pdiang iaki dur thymmai.
“Ka jingkhang ka BJP ka plie baroh 24 kynta bad 365 sngi. Ngi long kiba kloi ban pdiang iano iano ruh kiba kwah ban iasoh” ula ong.
Haba kylli la un dei ma u ka dur u CM kum u nongialam uba la don slem ha ka party, u Bah Hek ula ong “Ym namar ba u Bah Hek u dei u nongialam bala rim jong ka BJP, kam dei eh kumta. Mano manor uh kiba dei ki nongialam ki lah ban long ki dur jong u Myntri Rangbah na ka byntau 2028”.
“Ngi donkam ia u nongialam uban ialam ia baroh bad thaw ia ka Sorkar kaba khlain ban shakri ia ki paidbah ka Meghalaya” ula ong.
