Shillong, Nailur 13 : Haduh 6 ngut ki rang ialehkai phutbol ba tbit ka Jylla, kin sa mih madan ban iakhun ha ki jingialehkai jong ka lympung Indian Super League ba 11, kaba dei jong ka samoi 2024-25 bala sdang hynne ka sngi Thohdieng.
U Aiban Dohling, uba dei u rangïalehkai ba shadien, un phong ïa ka jersey jong ka Kerala Blasters. Ula wanrah ia ka jingshemphang bad ka jingshngain ha ka jingialehkai ba shadien jong ka kynhun katba ka dang thmu ban sdang ia ka samoi da ka jingkhlain. U Dohlong da ka rukom ialehkai ba mynta, u thikna ba un don ha ka thup jong ka kynhun ialehkai ba 11 jong ka Kerela Blaster.
Ha kajuh ka por, u Halen Nongtdu, u rangïalehkai ba shadien ba dang 19 snem ka rta, u la pynkhreh ialade ban pynkhlaiñ ïa ka kynhun ïalehkai ba shadien jong ka Mumbai FC. Ka jingjrong bad ka jingbiang ka met ka phad jong u, ka pynlong ia u kum u nongialehkai ban peit ha kane ka samoi. Utei u rangïalehkai ba dang 19 snem ka rta un kham bun ha ka jingshong ben bad la khmih lynti ba un ïoh tang katto katne minit ban ïalehkai.
Ki paidbah nongkyrshan kin apkhmih lynti bha ban ïohi ïa u Redeem Talang, uba pawnam napdeng ki nongïalehkai, bad uba dang shu ioh rah ia ka Durand Cup 2024 bad ka NorthEast United FC. Ka jingtbit ialehkai jong u Talang kan long kaba kongsan bha ha ka jingiakhun jong ka kynhun ban tur shakhmat. Hynrei, u artatien ban ïoh ïa ka por ïalehkai kaba bun namar ba un hap ban ïakhun ban ïoh ïa ka jaka jong u ha ka thup ki 11 ngut pyrshah ïa uwei pat u rang ialehkai ba tbit Jithin M. S.
U rangïalehkai ba dang shu wan thymmai Samuel L. Kynshi un ïalehkai nyngkong ha ka ISL na ka bynta ka Punjab FC kaba dang shu kiew kyrdan dang shen. Ula ïasoh sha kane ka klob ryngkat bad u Ricky John Shabong, ha kaba baroh arngut ki don ia ka thong ban pyni ia ka sap ialehkai ha kane ka samoi ba nyngkong jong ks club. Baroh arngut kin sdang da ka jing shongben hynrei u Kynshi ulah ban ioh kham bun ka por ban ialehkai.
Khatduh eh u dei u Padam Chettri, u ban pahara ïa ka kol na ka bynta ka Mohammedan FC, kawei pat ka kynhun kaba dang shu kiew kyrdan thymmai bad kawei na ki kynhun ba pawnam na Kolkata. U Chettri, u la ïoh ïa ka nam kum u nongapkol ba tbit bha ha ka I-League (2022-2023). Da ka jingshemphang jong u, u Chettri u thikna ba un dei u briew ba kongsan ban pahara ïa ka kol jong ka Mohammedan.
Ka Indian Super League (ISL) 2024-25 kan sdang da ka jingïakhun hapdeng ka ISL Champion Mohun Bagan Super Giant pyrshah ia ka Champion ka ISL Cup Mumbai City FC ha madan Vivekananda Yuba Bharati Krirangan (VYBK) ha Kolkata ha ka por 7:30 PM mynta ka sngi Thohdieng.
