Nongpoh,Nobprah 21: Ka Kynhun nongrep Ryndia ka thaiñ Umden ka “Nongtluh Eri Farmer Association” hynne ka sngi Palei, ka la pynlong ïa ka tamasa “Ri Kunai La Tynrai Festival” ha ka Shnong Umden bad kane ka Tamasa ka dei ka wat kaba 5 kaba la pynlong da ka kynhun.
Ka kynhun Nongtluh Eri Farmer Association ka dei ka shnat treikam jong ka Eri Organization kaba don ïaka aiñ treikam ban ri bad kunai ïa la ki tynrai naduh ka shad ka tem, ka rwai ka siaw, ka riam ka beit, ka lehniam bad kiwei kiwei.
Ban pynneh pynsah ia ka jingriewspah ka tynrai lajong, kane ka kynhun ka la sdang ban pynlong da kane ka tamasa Ri Kunai La Tynrai, ha kaba la ioh ban sakhi ia ki jingshad tynrai bad jingrwai tynrai kiba la pyni da ki kynhun bapher bapher.
La plie pyrda ia kane ka tamasa da u Symbud Myntri Rangbah ka jylla Bah Prestone Tynsong kum u kongsan ha ka jingiadonlang u MLA ka Nongpoh Bah Mayral Born Syiem, Marchborn Syiem nongialam ka Synjuk Rangbah Shnong ka Raid Nongtluh, kong T Syiem, Syiem Sad Raid Nongtluh, B Mallai President NEFA lem bad kiwei kiwei ki riew Rangbah.
Haba kren kum u kongsan, u Bah Prestone Tynsong, u la pynpaw ia ka jingkmen kaba khraw ban ioh ban wan dalade ban sakhi ia kum kane ka tamasa kaba kham kyrpang ka ban pynneh pynsah bad ban nang pynriewspah ia la ka riti ka dustur ka tynrai jong ka jaidbynriew hapoh ka Raid Nongtluh.
Ula ai jingiaroh ruh ia ki nongkitkam jong ka Nongtluh Eri Farmer Association kiba la iohi jngai ban pynlong ia kum kane ka tamasa khnang ba ka pateng ka pakit kan tip ia la ka tynrai bad ban pynneh pynsah lem ia ka.
Ha ka jan miet jong katei ka tamasa nalor ka shad ka rwai tynrai, la sakhi ruh ïaki jingrwai naki nongrwai bapher bapher bad ka jingïaid pyni riam da ki thei samla jong katei ka thaiñ.
