Shillong, Lber 28 : Ki Pulit ka East Khasi Hills, kila iohksai ia ki jingdonkti ki katto katne ki briew haba iadei bad ka jingshah bomiap ki arngut ki bar jylla ha Ichamati hynnin ka sngi Balang.
Arngut ki bar Jylla kiba kyrteng u Esan Singh bad u Sujit Dutta, kila shah bomiap ha ka thain Ichamati bad Dalda hynnin ka sngi ha ka kynhun ki briew ki bym lah satia ban tip ki dei kiei.
Kane ka jingjia kala jia hadien ba wai ka rally pyrshah Citizenship (Amendment) Act 2019, bala pynlong da ka seng Khasi Students Union (KSU).
“Ngi la ioh ksai ia ki katto katne ngut kiba ngi suba leh ia katei ka kam bymman ha Ichamati” ong u Superintendent of Police ka East Khasi Hills Rituraj Ravi.
Hynrei ula ong ba ki Pulit kim pat kem satia iano iano ruh. U iathuh ba ka jingtohkit mynta ka dang iaid shakhmat ban lap ia ki daw halor kane ka kam bymman.
Ha kajuh ka por, une u Heh Pulit ula kyntu ia baroh ba kin pynneh ia ka jingshongsuk bad ban iaid kat kum ka lynti ka ain.
