Shillong Lber 08: U Lamphang ka iingdorbar thawaiñ ka jylla u Thomas A Sangma, hynne ka sngi Thohdieng, ula leit jurip biang bad lum ruh ia ka jingialang bishar kam halor ka jingpyntrei ia ka ïingdorbar Thawaiñ ba thymmai ka Jylla ha Mawdiangdiang.
Ha katei ka jingialang la iadonlang u Myntri Rangbah ka jylla u Conrad Sangma, ki Symbud Myntri Rangbah ka jylla u Bah Prestone Tynsong bad u Bah Sniawbhalang Dhar, u Myntri ka tnad Bording u AT Mondal, u myntri ka tnad PHE u Marcuise N Marak, ki Contractor, Design Associates bad ki heh ophisar na ki tnad bapher bapher.
Hadien ka jingwan jurip bad ka jinglum ia ka jingialang bishar kam, u Lamphang ula pynpaw iaka jingsngewhun ha kaba iadei bad ka jingiaid ki kam ki jam jong ka jingtei ia ka iingdorbar kaba thymmai.
Ula ban jur ba dei ban pynurlong ia ka jingthmu ban pyndep ia kane ka jingtei hapoh une u snem bad da ka jingkhmih lynti ban ioh pynlong noh ia ka Dorbar ha kane ka iingdorbar bathymmai jong ka jylla.
Nalor kane, u Lamphang ula ban jur ruh ia ka jingkongsan ban peit ia ka jingshngain bad ban bud ryntih ia ki kyndon ha ka rukom tei bad ban shna thikna khlem da iapeiñ ia ki lada jingiada.
Ula pynthikna ba katba ki dang ialeh ban pyndep ha ka por kaba la buh, kam dei ban don pat kano kano ka jingpynbor ia u contractor bad design associates kaban buh pat ha ka jingma ha kaba iadei bad ka jingshngaiñ.
U Lamphang ula pyntip ruh ba u Myntri Rangbah, ki Symbud Myntri Rangbah kila pynpaw ia ka jingsngewhun ha kaba iadei bad ka jingiaid shakhmat ka kam jong ka jingtei ia ka iingdorbar.
Nalor kane, ula pyntip ba la dep ban thied lut ia baroh ki tiar kiba donkam ha ka Main Central Hall bad ula khmih lynti ba ki kam ki jam baroh kin long kiba iaid beit iaid ryntih ha ka jingpyntrei ia kane ka project.
