Shillong, Naitung 22: Ka Health Policy kaba ka sorkar jylla ka pyllait paidbah ha u 2021 ka la wanrah lai tylli ki jingkylla ha ka liang ban pynjanai shuh shuh ia ka jingtreikam khamtam haba iadei bad ka koit ka khiah jong ki nongshong shnong.
Mynta ka sorkar ka la shim shuh shuh ki sienjam da kaba pynwandur shuh shuh ia ki kyndon na ka bynta ban ioh ia ka jingsumar kaba kham bha shuh shuh lane Comprehensive Primary Health Care (CPHC) kaba ym tang ba ka long kaba salonsar, hynrei ban ioh ia ka jingsumar ei kaba iahap bad ka imlang sahlang.
Na ka liang ka National Health Mission, Meghalaya ha ryngkat ka jingiatrei lang bad ka Centre for Policy Research, New Delhi ka la pynlong ruh da ka jingiaphylliew jingmut naduh ka 20tarik haduh ka 22tarik mynta u bnai ha Meghalaya Administrative Training Institute (MATI), Mawdiangdiang, halor ka jingpynwandur ia ki kyndon jong ka CPHC na bynta ka Meghalaya.
Ka jingthmu jong katei ka jingialang ka long ban wallam lang ia baroh kiba don bynta ha ka koit ka khiah khamtam eh ban pynwandur na ka bynta ban pyntreikam ia ki kyndon.
Ha ka sngi Nyngkong ka jingiatai hi kadei beit bad ki riew paidbah, ki Self Help Groups, ki frontline health worker bad ki programme manager jong k atnad ka Koit ka Khiah, nangta jong ka Social Welfare bad ka tnad C&RD (National Rural Livelihood Mission).
Ha ka sngi pynhap pyrda pat la donlang ruh u Sampath Kumar, Principal Secretary ka sorkar jylla ha ryngkat ka jingdonlang u Dr. Mekhala Krishnamurthy, Senior Fellow ha Centre for Policy Research (CPR), New Delhi hapoh ka jingialam jong u Dr. T. Sundararaman, Executive Director barim ka National Health Systems Resource Centre bad Professor barim ka Internal Medicine, JIPMER, Pondicherry, bad ruh u Rajeev Sadanandan, Health Secretary (Retd.) jong ka sorkar Kerala bad CEO, Health Systems Transformation Platform.
Na ka liang ka sorkar jylla ka pynpaw ruh ia ka jingkmen kaba khraw ba la donlang ruh ha katei ka sngi naduh ki riewshemphang kum u Dr Sundararaman bad u Sadanandan, kiba la shemphang bha halor ka jingpynwandur ia ki polisi kiba iadei bad ka koit ka khiah la ka long na ka bynta ka jylla ne wat ha ka ri hi baroh kawei.
La donlang ruh ha kane ka sngi naduh u Director of Health Services(MI), Director of Health Services(MCH), Director of Health Services(R), Mission Director NHM, DMHO bad ki Medical Officer.
