Shillong, Jylliew 8: Ki dkhot jong ka Hynniewtrep Youth Council, hynne ka step 8 tarik u Jylliew kila ioh ban bat ia u wei u nong Bangladesh uba ioh ban rung sha u pud u sam jong ka India, lyngba ka shnong Patharghat bad Kalatek kaba hap hapoh Shella kaba don ha Khappud Indo-Bangla.
Katkum ka kyrwoh khubor, u President ka HYC Jatap Area samla Pyndap Shongwan ula iathuh ba ia une u nong Bangladesh la ioh ban bat da ki dkhot ka HYC, Jatap bad Shella Area unit, hadien ba ki ioh jingtip ba u don ha ka thain bad la ioh bat ia u da ka jingiarap ki nongshong shnong.
Hadien ba la iohkem, la ioh jingtip ba kiwei pat kiba wan ryngkat ki lah lait phet na katei ka jaka ba kynthup ia katto katne ki lah leit rung biang shapoh u pud ka Bangladesh bad katto katne ki lah rung sha India, ula iathuh.
Une u nong Bangladesh ba shah kem, ula phla ba ula wan rung sha India ban iarap ia ki briew kiba ruh tuh sha India bad ruh ban leh ia ki kam khaii tuh ia ki tiar ki tar ha ryngkat ki arngut ki nong India kiba shong bas ah ha ka shnong Kalibari. U iathuh ba kine ki briew ki kyrteng u Bono Biswa bad u Subash Baidya.
Ula phla ba kine ki laingut ki ju shim T.1000 na uwei u briew ban pynrung tuh sha India. Nalor kane, ula phla ruh ba ka kamram jong u ka long ban ialam lynti bad pynlait ia ki briew n aka jingker ha khappid bad hadien kata, ki arngut kin sa wan shaw bad ialam ia ki sha Shillong bad sha kiwei kiwei ki jaka.
U samla Pyndap u iathuh ba ha ka jingtohkit, une u nong Bangladesh ula phla ba ka jingpynrung tuh ia ki nong Bangladesh na ka thain khappud ka Shella, kala iaid mynta la shibnai tam bad man ka miet, kumba 10 ngut eiei ki nong Bangladesh kila wan rung sha India ba kynthup ia ki kynthei.
Ula phla ruh ba tang ma u marwei, ula lah ban pynrung hapdeng 50 ngut haduh 60 ngut eiei ki nong Bangladesh tang ha kine ki khyndiat sngi bala leit.
Na ka liang ki dkhot ka HYC ki la aiti ia une u briew sha ki pulit ka Shella Police Station bad dawa ba dei ban shim khia ban pynlong ka jingtohkit kaba thikna halor ki jingphla jong utei u nong Bangla bad ban kem ia ki Dalal na India kiba lah pynpaw haneng.
Ka Seng ka kyntu ruh ia ki bor pulit bad ki Shipai BSF ba kin shimkhia bha ia kane ka kam khnang ban lap ia baroh kiba donkti ha kane ka kam khaii briew lyngba ka khappud bad kumjuh ruh ban lap bad kem ia baroh ki briew kiba lah wan rung tuh shapoh India katkum ka jingpynpaw jong utei u Khar Bangla.
Ia kane ka jingjia lah pyntip ruh sha ki Nongialam ka CEC kiba lah pyntip pat sha u SP ka East Khasi Hills bad SDPO, Sohra Sub-Division bad sha ki heh ka BSF Meghalaya Frontier na ka bynta ban shim khia ia kane ka kam.
