Jingjia ba ngiew ia ki nong Indore | Shim suo motu case ka NCW, pan kaiphod na ka DGP hapoh 72 kynta

Shillong, Jylliew 08 : Ka National Commission for Women (NCW) kala shim ia ka suo motu case halor ka jingjia ba sngew ngiew kiba jia na ka jingshah pyniap u Raja Raghuvanshi bad ka jingjah rngai ka kurim, ka Sonam, ha ka jingleit leh honeymoon sha Sohra, Meghalaya.

Ki jingsuba kila mih ba kane ka kurim (Sonam) ka lah ban ngat ha ka kam khaii briew sha Bangladesh, khamtam lei hadien ka jingioh tam ia ka jainjri ba khah jaboh bad ka jingdon kiba iohi ia kine ki shikurim bad lai ngut ki bar jylla ki bym lah ban ithuh.

Ka Chairperson ka NCW Vijaya Rahatkar kala bthah ia ka Director General of Police (DGP) ka Meghalaya ba kan pynjur ia ka jingwad da kaba pyndonkam ruh ia ki kor ki bor ka juk mynta, kynthup ka jingsyntiat da ki drone, ki ksew sma bad ka kynhun tohkit ba kyrpang.
Kala kyntu ruh ban wad thikna ia ki dak sakhi ba lah ban lam sha ka jingioh jingtip shaphang kine ki shikurim, ha ryngkat ka kaiphod ba bniah, ka ban aiti sha ka Commission hapoh ka lai sngi.

Ha kajuh ka por, u Myntri Rangbah ka Madhya Pradesh Mohan Yadav ula kyrpad ia ka Home Ministry ban aiti noh ia kane ka case sha ka Central Bureau of Investigation (CBI). Hynrei, ka Sorkar Meghalaya kam pat kwah iaka jingtohkit CBI ia mynta bad u Myntri ka Tnad Jngohkai Bah Paul Lyngdoh ula ong ba ki Pulit ka Jylla bad ka Special Investigation Team (SIT) ki long kiba lah ban pyniaid ia ka jingtohkit.

Uwei u Nongialam lynti (Tour Guide) Albert Pde, ula iathuh ba ula iohi ia u Raja bad ka Sonam bala synran da lai ngut ki shynrang haba kiew na Nongriat sha Mawlakhiat, kaba la jia tang khyndiat por shuwa ka jingpyniap ia u Raja bad jingjah rngai ka Sonam.

Ki Pulit ki dang bteng ia ka jingtohkit kynthup ka jingwad ruh ia kano kano ka sakhi ka ban pyniasoh sha ka kam khaii briew lane ka jingjam sha shiliang u pud ka Ri. Kaei kaba jia halor ka jingjah ka Sonam ka dang sah ha ka umdum haduh mynta mynne.