Shillong, Iaiong 12: Ka T20 League kaba la pynlong da ka Eastern West Khasi Hills District Cricket Association kala kut noh ha ka sngi Palei ha kaba ka kynhun Hurricane kala pynliem ia ka Nongthliew ban ioh rah ia ka nam lahduh.
Ha katei ka jingialehkai ia ka final la leit ban sakhi da u President ka Meghalaya Cricket Association u Nababrata Bhattacharjee bad u Honorary Secretary ka MCA u Bah Gideon Kharkongor bad kiwei kiwei.
Ka EWKHDCA kadei ka District Cricket Association kaba la ioh jingithuh na ka MCA bad la pynrung shwa ia ka kum ka dkhot kaba shipor ha ka MCA ha ka jingialang kaba la long ha u Nohprah 2023.
Ki nongialam ka MCA kila pynlut ruh ia ka por ka jongki ha kaban iakren bad ki nongialehkai Cricket jong ka Pathway Academy ia kaba la ai jinghikai da u Bah Bhakupar Mylliemngap, uba dei uwei na ki Coach uba la ioh ia ka jingithuh na ka National Cricket Academy bad ia katei ka kynhun la pyniaid da ka District Association.
“Ka EWKHDCA kala trei shitom ha kaban kyntiew ia ka jingialehkai Cricket ha ka thain bad ka MCA ka iengskhem ha kaban ai jingkyrshan ha baroh ki liang” ong u Naba Bhattacharjee.
“Ka long kaba sngewtynnad ban iakynduh ia u Babu Boldness Nongrum, u paralok uba la rim la jah, uba la ailad ban ialehkai Cricket ha ka madan jong ka Khatsawphra Sports Association. Ngi kyrmen skhem ba bun ngut ki nongialehkai cricket kiba tbit kin mih na kane ka district,”ong u President ka MCA.
