Shillong, Naiwieng 01: Ka Fashion Society Shillong kala pynlong ia ka jingiakob thei bhabriew ne ka Miss Shillong 2024 ha Soso Tham Auditorium ha kaba na ki 15 ngut ki nongiashimbynta ka Gracey Nandi kala long ka lahduh bad kala ioh phong ia ka pansngiat Miss Shillong 2024, katba ka Mahima Sinha kala ioh iaka First Runners Up bad ia ka Second Runners Up la ioh da ka Loretta Laloo.
Ha kane ka jingiakob, ki thei bhabriew kila iashimbynta ha ki 3 tylli ki Round kaba kynthup ia ka Retro, Executive bad Evening Gown ha kaba ki hap ban pyni ia ka sap ka phong ka jongki, kaba la khring ia ki nongpeitkai bad ia ki nongbishar.
U Chief Executive Member (CEM) ka Khasi Hills Autonomous District Council u Bah Pyniaid Sing Syiem ula long u Kongsan bad u Bah Fredrick R Kharkongor ula long u symbud kongsan ha kane ka jingiakob.
Ki nongiashimbynta ha kane ka rynsan iakob thei bhabriew kila leit iashimbynta ha ka jingioh jinghikai kaba shi bnai, ha kaba la saindur ia ka sap ka phong ka jongki bad ban pynlong ia ki kiba skhem ka jingmut jingpyrkhat bad kiba shaniah ha lade ban pynthikna ba kila long kiba la pynkhreh ban mih ha ki rynsan iakob.
Ki thei samla kiba la ioh rung sha ka Final kila pynshohbiej ia ki nongbishar da ka sap ka jongki, ka jingtbit bad ka jingshemphang haba kila jubab ia ki jingkylli halor ki mat kiba kongsan kiba kynthup ia ka phang halor ka Artificial Intelligence (AI) kaba dei ka sobjek kaba ki nongiashimbynta kila ioh ban jubab bad ban batai bniah.
Nalor kitei ki khusnam kiba kyrpang, la sam ruh ia kiwei pat ki khusnam sha ki nongiashimbynta, ka Loretta Laloo kala ioh ia ka khusnam Viewers’ Choice Award na ka Mawphor e-paper, katba ka Angelina Jackson kala ioh ia ka khusnam Viewers’ Choice Award na ka Shillong Times e-paper.
Nalor kane la sam ruh ia ka khusnam Miss Beautiful Smile bad Miss Sparkling Eyes.
Ka Gracey Nandi kaba la ioh ia ka nam Miss Shillong kala ioh pdiang ia ka song pisa kaba T.1 Lak, ka Mahima Sinha kaba la ioh 1st Runners Up kala ioh T.75,000 bad ka Loretta Laloo kaba la ioh 2nd Runners Up kala ioh T.50,000.
Ka Gracey Nandi mynta kan jam shaphrang ban long kum ka nongrah tiensyiem ha ka liang ka kolshor bad kaba la pynkhreh ban mihkhmat ia ka Shillong ha ki rynsan iakob kiba heh bad kala long ruh kum ka nongai mynsiem ia kiwei pat ki thei samla kiba don ha kylleng jong kane ka jylla.
