Shillong, Jymmang 15 : Ka Khasi Students’ Union (KSU) Delhi Unit, hynnin ka sngi Balang, kala ioh ban pyllait ia kawei ka samla kynthei ba na East Jaintia Hills, kaba shah pynbeij bad jan shah pyniaid kam awria ha Delhi.
Kat kum ka kyrwoh na ka KSU-Delhi Unit, la pyntip ba ka seng kala ioh pdiang ia ka phone call na kane ka samla kaba lah pan jingiarap ba kyrkieh namar ka jing don ki briew kiba bud ia ka. Kala pynpaw ruh ia ka jingsheptieng ba kine ki briew ki don ia ka jingthmu kaba sniew.
La pyntip ba mar syn iohpdiang ia kane ka phone call, ka Seng kala pyntip mar mar sha ki Pulit bad ka seng lem bad ki Pulit, kila leit sha ka jaka ba kane ka samla ka don.
Ha ka jingtohkit, la shem ba kane ka samla kala shah pynbiej ha ki briew ba kan wan sha Delhi da ka jingthmu ban pyniaid kam awria ia ka.
La iathuh ba ki Pulit bad ka seng kila pyrshang ban wad ia ka jaka sah jong kane ka samla hynrei mar iatip ia kane, ki briew kiba don ha kane ka Iing, kila phet krad noh bad ieh ia kane ka samla.
Ia kane ka samla lah leit buh noh ha ka jaka kaba shngain hapoh ka jingpeit jong ki bor ka Sorkar bad ki kam kila iaid shakhmat ban lah pynphai noh ia kane ka samla sha Meghalaya.
Ki Pulit ka Delhi kila register case halor kane ka jingjia bad ka jingtwet ia kine ki briew kala iaid shakhmat.
Ka KSU Delhi Unit ka pynpaw ïa ka jingpyrshah kaba tyngeh halor kino kino ki kam thombor ïa ki kynthei bad kyntu ruh ïa ki paidbah ban long kiba husiar bad pynsngew kloi sha ki bor ba dei peit lada lap ne suba don kano kano ka jingjia kaba kum kane .
Ka Union ka ai khublei kyrpang ïa ki Pulit ka Delhi halor ka jingïatreilang bad ka jingpyrkhat lang ha kane ka kam, bad ka long ruh kaba kloi ban ai jingkyrshan.
