Guwahati, Naitung 12: Ki bor pahara Railway Protection Force (RPF) jong ka N. F. Railway ki la lah ban pyllait im ia sawngut ki kynthei ka ba kynthup ia 2 ngut ki ba dang hapoh ka rta hadien ba ki la pynlong ia ka jingtalasi ka ba ki ju leh ban tehlakam ha ka ba iadei bad ki kam khaii briew ha ka 8 tarik mynta u bnai na ki steshon rel bapher bapher.
“Ha ka 8 tarik mynta u bnai, ka kynhun ka RPF na ka tnat Anti-Human Trafficking Unit jong ka Dimapur ki la pynlong ia ka jingkhynra hadien ba ki la ioh ia ka jingtip ka ba bniah hapoh ka steshon rel ha Dimapur. Kane ka kynhun ka la ioh ruh ban kem noh ia uwei u briew ia u ba la suba donkti ha ki kam khaii briew ha ryngkat bad arngut kiwei pat ki kynthei napoh katei ka steshon rel.
Ia kine ki briew ba la shah kem la wanlam shapoh ka ophis ka RPF ha Dimapur na ka bynta ban pynlong ia ka jingtohkit. Katba ia kitei ki kynthei ba la ioh pyllait im hadien la aiti noh sha ka tnat pulit ki kynthei ha Dimapur hapoh ka jingkhmih jong ka sorkar Nagaland na ka bynta ban leh ia ka ba donkam.
Ha ki artylli kiwei pat ki jingjia ki ba la jia ha ka 8 tarik mynta u bnai, ka kynhun pahara ka RPF ki la ioh ban pyllait im ia arngut ki khynnah kynthei ki ba dang hapoh rta napoh ka rel Rangiya-Dibrugarh Express bad Rajdhani Express.
Ia ka khynnah ba la ioh pyllait napoh Rangiya-Dibrugarh Express la aiti noh sha ka Child Line, Dibrugarh katba ia kawei pat ba la ioh pyllait na Rajdhani Express la aiti sha ka GRP, Mariani post ki ba la lah ban aiti pat sha la ki jong ki kmie ki kpa.
Ki bor pahara RPF ka N. F. Railway barabor ki la peitngor bha ha ka ba iadei bad ki kam khaii briew.Ka RPF kum ka kynhun pahara kam shym la sahdien kumba long kiwei pat ki tnat pahara jong ka India ban khmih na ka bynta ka jingshngain jong ka ri bad ban rah dyngkhong ia ki kam khaii briew bad kiwei pat ki kam beain, bad ka kynhun RPF ka la shim ia ka bynta ka jong ka da ka jingshlur.
