Shillong, K’lyngkot 25 : Ka Jylla Meghalaya kala shim ia ka sienjam kaba kongsan ha kaban pynkhlain ia ki jaka ai jingsumar, da ka jingdep jingpule jong ki 25 ngut ki Doctor ha ka Postgraduate Diploma in Family Medicine (PGDFM) Program.
Ia kane ka jingaiti ia ki syrnod la pynlong ha Dr H. Gordon Roberts Hospital, Shillong, ha kaba 22 ngut ki doctor kiba ai jingshakri ia ka sorkar bad 3 ngut ki doctor na ka Hospital kila ioh pdiang ia ka Postgraduate Diploma ka jongki.
Ka PGDFM program, kadei kaba la kyrshan da ka National Health Mission (NHM), Meghalaya da ka jingiatreilang bad ka Christian Medical College (CMC), Vellore da ka jingthmu ban pynkup bor ia ki nongtrei kiba hakhmat eh ha ka koit ka khiah ban ioh ia ki jinghikai kiba paka bad kiba ha kane ka juk kaba mynta ryngkat bad ka jingai jinghikai pyntbit ban shakri ha ki jaka ai jingsumar.
Kane ka program ka pynleit jingmut ha kaban bteng ban ai jingsumar, ban pynduna ia ka jingphah sumar ia ki nongpang sha kiwei pat ki jaka sumar bad ban kyntiew ia ka lad ban ioh ia ka jingsumar kaba bha khamtam eh ha ki thain nongkyndong bad ha ki jaka kiba jngai bad kiba jynjar ban leit ban wan.
U Dr Sampath Kumar, IAS, Principal Secretary ka Health and Family Welfare, uba la pyniasoh ialade bad kane ka jingialang lyngba ki kor ki bor, ula banjur ia ka jinglong kordor jong kane ka prokram ai jinghikai kaba la pynlong da ka CMC Vellore bad Dr H. Gordon Roberts Hospital, khamtam eh ia ki doctor kiba leit shakri ha ki jaka kiba don ha kyndong eh. Ula pyniaryngkat bad ki jylla kum ka Bihar bad Chhattisgarh, kiba la seisoh ha kaban pyndep ia kum katei ka jait ai jinghikai ha ka rukom kaba heh ban kyntiew ia ka jingai jingsumar ha ki jaka ai jingsumar.
Ula pashat ia ki symboh, ba ha ki por ban wan ruh ka jylla Meghalaya kan iai bteng ia kane ban kyntiew ia kane ka jingai jinghikai na ka bynta baroh ki Doctor kiba shakri ha baroh ki Primary Healthcare bad ula ai khublei ia kine kiba la pyndep ia kane ka jingai jinghikai bad kubur ia ka jingdon ia ka jingiatreilang kaba la lam ia ka koit ka khiah ha ka jylla ban jam shaphrang.
U Ramkumar S, Health Secretary, ula pynpaw ba ka jingthmu kaba hakhmat jong kane ka PG Diploma in Family Medicine kadei halor ki 3 tylli ki A ha kaban ai jingshakri ia ki paitbah kaba kynthup ia ka Accessibility ne ka lad ban ioh jingsumar, Affordability ne ka jingkot bor bad Availability ne ka jingdon.
Ula pynpaw ba ha ka jylla kum ka Meghalaya, ki nongpang kim don ia ki lad ha kaba iadei bad ka jingioh ia ka jingsumar, kumta ka long kaba kongsan bha ban pynkup bor ia ki doctor da ki jinghikai pyntbit kiba paka ban weng ia katei ka jingeh hapdeng ka jingai jingsumar kaba kumto bad kaba la kham pyntbit shuh shuh.
Ula ong, ba kane ka jingai jinghikai kan iarap ha kaban pynduna ban phah ia ki nongpang sha kiwei pat hynrei kan ailad ia ki ban khmih ia ka jingpang bad ban ai jingsumar ban pynkhlain ia ka koit ka khiah ha ki shnong ki thaw. Ula kyntu ia kine kiba la pyndep ia kane ka jingpule ba kin long kum ki nongkit tiensyiem ia kane ka prokram bad ka kdew ba kane kan iarap ha kaban kyntiew shibun ia ka jingai jingshakri ia ki paitbah.
U Ramakrishna Chitturi, IAS, Managing Director, NHM Meghalaya, ula banjur ia ka bynta kaba kongsan jong kine ki doctor kiba la pyndep ia kane ka jingpule ha kaban wanrah ia ka jingkylla ha ka koit ka khiah ha ka jylla Meghalaya.
Ka Dr. Janupribalas S. Momin ka Director of Health Services (Medical Institutions), kala ai ka jingithuh ia ka jingskhem jingmut bad ia ka jingdon ia ka akor kaba long kongsan bha ban lah ban pyndep ia kane ka Diploma. Kala banjur ba ki doctor kiba la ioh ia kane ka sap thymmai na kane ka jingai jinghikai ki don ia ka jingkitkhlieh kaba khraw ban pynkoit ia ki jingim ia kaba ym lah ban niew shuh bad kala pynkynmaw ia ki, ba ka jingai jingsumar kadei ban long da kaba bud ryntih ia ki nongrim, kaba don ia ka mynsiem sngewlem bad kadei ruh ka jingioh jinghikai ka bym ju kut.
U Dr. Kenneth Nongpiur, Medical Superintendent jongka Dr. H. Gordon Roberts Hospital, ula pynpaw ia ka jingkmen ia kane ka wat kaba nyngkong jong ki doctor kiba la pyndep ia kane ka jingpule bad ong ba kane ka jingjop kadei ka sakhi ia ka jingtrei shitom ka jongki bad ka jinglen lade mynta palat 2 snem. Ula banjur ba kane ka Diploma kan wanrah ia ka jingkylla ym da kaba pynleit jingmut tang ha kaban tohkit bniah ia ka jingpang hynrei ban iaid ha ka lynti kaba long salonsar bad ka jingiadei bad ki nongpang.
Ki 4 ngut ki doctor kiba la pyndep ia ka Diploma haba kren ha kane ka jingialang kila pynpaw ba kitei ki 2 snem ba kila ioh ia ki jinghikai kala kylla long kum ka lynti iaid kaba wanrah ia ka jingkylla ha ki, kaba pyniasoh ia ka jingioh jinghikai kaba janai bad ka rukom treikam ka jongki ha ki jaka ai jingsumar.
Kila pynpaw ba kane ka prokram kala pynkupbor ia ki ban iaid shaphrang ban khmih ia ki jingpang bad ban sumar ia ki nongpang bad ia ki bahaiing bahasem kaban ioh ia ka jingshaniah kaba skhem ha kaban shim ia ki rai ha ka jingai jingsumar hapoh ki jaka sumar.
La sdang ia kane ka jingai jingithuh ne ka jingpynkup burom, da kaba buh jingduwai kyrpang bad hadien kane la pyniaid shakhmat da ka jingsam ia ki syrnod bad ka jingpynbam smai ia ki doctor kiba la pyndep ia ka jingpule ia kaba la ialam da ka Dr Adeline Sitther, kaba la iengskhem ha ka jingshim ia ka jingkitkhlieh ban aiti ialade na ka bynta ban shakri ia ki parabriew bad ban shimkhia ia baroh ki kam da ka mynsiem jong ka jingieid bad jingsngewsynei bad ban batskhem ha ka nongrim “Ym ban shah shakri hynrei ban shakri kylla”.
Kala pynshlur ia kine kiba la pyndep ia ka jingpule, ba kidei ban trei da kaba bud ryntih bad ban pyndonkam ruh ia ka jinghikai kaba kila ioh, ban ai ka jingsumar da kaba buh hakhmat eh ia ki nongpang bad ban shakri ia ka imlang sahlang.
 Program. ){kind=link}