Shillong, Nailur 24: U Prof. Prabha Shankar Shukla, uba long u Vice-Chancellor ka skulbah NEHU, ha ka sngi thohdieng ula ioh pdiang iaka Elite Academic Award 2022 haka Global Conference on Computing, Power and Communication Technologies 2022, kaba la pynlong daka Institute of Electrical and Electronics Engineers (IEEE) ha nongbah Delhi.
Ka IEEE ka dei kawei na ki kynhun kaba heh jong ki riewstad bad riewshemphang haka pyrthei kaba don haduh 400,000 ngiut ki dkhot bad katei ka kynhun ka treikam ha ki 150 tylli ki Ri.
Ka IEEE ka dei ka kynhun kaba don iaka bor ha kaba iadei bad kiba bun ki liang kaba kynthup iaka Biomedical Engineering, Electric Power, Consumer Electronics, Computers bad Telecommunications.
“Ka IEEE, ka don iaka jingkitkhlieh ha kaban kyntiew ia ki kor teknoloji bad kala thaw kumba 900 tylli ki karkhana kiba paka bad pynmih 30% ia ki jingthoh jingtar haka lain Electrical bad Electronics Engineering bad Computer Science. Man la u snem kane ka kynhun ka bei tyngka ban pynlong 850 tylli ki jingialang ha kylleng ki ri jong kane kapyrthei” ong u Vice Chancellor ka NEHU.
Ula ong, ka Science & Technology kala leh ia ki kam kiba khraw ha kaban wanrah iaka jingkylla ha ka ioh ka kot bad haka imlang sahlang ha ka Ri khamtam eh haka thain nongkyndong.
U Prof Shukla u la ong, kila don lypa ki jingbuh thong bad ki jingthmu jongki jaka pule Science ban pynthikna ba kan don ka jingkiew ha ka roi ka par bad ki katto katne ki prokram kiba kongsan hapoh ka Ri, ki kynthup iaka Science and Society Program jongka Department of Science and Technology (DST) Government of India. Ka kynthuplang ruh iaka Science (S) and Technology (T) Application for Rural Development (STARD), S and T Application for the Weaker Sections (STAWS) bad kumjuh ruh ia ki prokram ban kyntiew ia ki kynthei bad ia ki paid riewlum.
