Shillong Iaiong 10 : Arngut ki Nongiasaid Ain ka Meghalaya High Court, kila ioh pdiang ia ka shithi byrngem bala thep lang bad artylli ki kuli na ki briew ki bym lah satia ban tip ki dei kiei.
Ia kane la pyntip da ka High Court of Meghalaya Bar Association, kaba la lum kyrkieh ia ka jingialang hynne ka sngi Balang ban iasyllok halor kane ka shithi byrngem.
Kat kum ka kyrwoh bala phah da u President ka High Court of Meghalaya Bar Association S Chakrawarty bad ka Secretary General Kong NG Shylla, la ong ba ka Association ka pynrem jur ia kane ka jingshah byrngem byrsit ki arngut ki nongiasaid ain ba pawkhmat ka Jylla.
Ki pyntip ba kine ki nongiasaid Ain kila ioh pdiang da ka shithi ba byrngem byrsit ia ki, ia kiba la thep lang bad ki kuli.
Kine ki Nongialam ka Association kila pyntip ba kine ki briew ba byrngem, kila byrngem ban leh da kaba tyngeh ia kine ki nongiasaid ain lada ki dang iai bteng ban mihkhmat ha kaba iasaid ia ka mukotduma ia ki katto katne ki briew (clients) bad iashimbynta ha ka mukotduma ba donlang kine ki briew (clients).
Ki dkhot jong ka Bar Association da kawei ka sur kila pynpaw ba katei ka jingleh ka long ka bym iahap bad ka ka jingtuklar ia ka kam kaba don ka jingkitkhlieh jong kine ki nongiasaid aiñ bad ong ba kam dei satia tang ka jingmushlia ia ka hok ba kordor bad ba pynkup bor da ka Riti Synshar hynrei ka dei ruh ka jingthombor ia ki paia jong ka imlang sahlang kaba la shai.
“Kumta da kawei ka sur bad jingmut la rai ba katei ka jingleh da kaba byrngem byrsit ia kitei ki arngut ki nongiasaid aiñ ka dei kaba la pynrem jur da ka Association ryngkat bad ka jingpynthikna ia baroh ki nongiasaid aiñ ba ka Association kan iai don ryngkat beit bad ki ha kum kine ki khyllipmat” la pynpaw ki nongialam ka Association.
