Shillong, Rymphang 26 : U Myntri Rangbah ka Jylla Conrad K Sangma ha ka sngi Nyngkong, ula pyntip ba ka Sorkar kala ioh pdiang palat 30,000 tylli ki aplikeshon hapoh ka CM-Elevate tang hapoh ka arbnai.
“Ngi la iohpdiang palat 30,000 tylli ki aplikeshon ia ka CM-Elevate hapoh ka 2 bnai. Na kine, 20,000 ki dei jong ka kam ri jingri jingdup. Hapoh ka CM-Elevate, ka Sorkar kala 50% ka subsidy” ong u Conrad haba jubab hapoh ka Dorbar Mangtyngka ka Jylla.
Ha kajuh ka por, u Myntri Rangbah ula ong ba ia mynta hi, ka kam ri jingri jingdup kam pat dei kaba la khein ha ka thup ki karkhana (industry) hynrei ka food processing ka dei ka karkhana (Industry).
Haba u MLA ka UDP na Mawkyrwat Bah Renikton L Tongkhar u kwah ban tip ia ki subsidy ba ai ia ka kam ri jingri jingdup, u Myntri Rangbah ula ong ba ia ka prokram ka dei kaba dang shu sdang ha u snem bala leit noh ha kaba ka Sorkar kala sam ia ki khun sniang, khun syiar sha ki nongrep bapher bapher.
Ula ong, kawei na ki prokram ba kongsan eh ka dei ka CM-Elevate, ha kaba ka Sorkar kala ai ia ka subsidy kaba heh duh khamtam sha ki kam ri jingri jingdup kaba long haduh 50%.
Halor ka jingkylli balei ka Sorkar kam ai lang kajuh ka jingmyntoi bala ai hapoh ka Industrial Policy sha ki nongri jingri, u Myntri Rangbah ula ong “Ka daw hi ka long ba ka kam ri jingri ka dei ka kam ri jingri bad ka kam karkhana ka dei ka karkhana kat kum ki jingbatai bad kumta, ym lah satia ban pyniakhleh”.
Hynrei ula pyntip ba ka Sorkar kala ai ia ki jingkyrshan kiba bun ia ki nongrep hapoh ka Jylla. Ula pyntip ba palat 100 tylli ki pickup truck la ai ban pynkit ia ki marrep jong ki nongrep. “Ngi kwah ban ai biang sa 500 tylli ki kali ha kine ki san snem ban wan” ula ong.
