Shillong, Jylliew 28: Ka National People’s Party (NPP)-Jirang kala nang ioh mynsiem mynta ban leit sha ka elekshon MLA 2023 da ka jingwan pyniasoh haduh 300 ngut ki Nongialam bad Nongkyrshan jong ka seng Congress, ka BJP bad UDP sha ka NPP kaba synshar mynta ia ka Jylla.
Ia kine ki Nongialam bad nongkyrshan jong ka Congress, BJP bad UDP ka Jirang kiba la pyniasoh sha ka NPP, la pdiang sngewbha da u MLA ka thain uba dei ruh u President ka NPP Jirang Block Bah Sosthenes Sohtun ha ka jingiadon lang u MDC Bah Victor Rani bad kiwei kiwei ki Nongialam.
Ki Nongialam haba ai jingkren, kila ong ba ka jingshim ia ka rai ba khatduh ban pyniasoh sha ka NPP ka dei namar ka jing iohi ia shibun ki jingkylla haba phai sha ki kam pynroi bad ka jingshimkhia kane ka Sorkar ba ialam da ka NPP ban leh shibun ki kam ha Khappud.
“Ngi la sakhi ba u MLA Bah Sosthenes Sohtun ula lah ban pynkylla dur ia ka Constituency tang hapoh ka 4 snem shiteng da kaba leh ia shibun ki kam kiba la sahteng da ki phew snem”.
Kine ki Nongialam kila pynpaw ruh ba kin nang trei shitom shuh shuh mynta ha kaban pynneh ia ka Jirang Constituency kum ka Constituency ba mihkhmat da ka NPP.
“Ngin trei shitom ba u MLA un wan phai biang ha u 2023 bad ka Constituency kan sa nang iohi ia shibun ki jingkylla bad ki kam pynroi ki ban sa wan” kila ong haba kdew “ Ki jingdonkam ba hakhmat eh jong ka Constituency ki dei ki surok, ka jingsam umbam umdih, ka pule ka dangle ia kaba la wanrah jingkylla da ka NPP tang ha kine ki kato katne snem bala leit noh”.
Haba pdiang burom ia kine ki Nongialam bad Nongkyrshan, u Bah Sosthenes ula pynpaw ia ka jingkmen ban pdiang ia ki kum kiwei pat ki Nongialam ba thymmai ka NPP bad ula pan ia ka jingiatreilang na ka bynta ka elekshon MLA ban long ha u snem 2023.
Une u MLA ula ong ruh “Ka NPP ka da shimkhia shisha ban pyndep ia kaei kaba la kular khamtam ban wanrah ia ka jing kylla hapoh ka Jirang Constituency kaba sahdien tam hapoh Ri-Bhoi District” haba bynrap “Ka NPP kala lah ban punurlong ia ki jingkular tang ha kine ki saw snem tam bad kan sa nang ai shuh shuh ia kiba bun ki kam pynroi ha ki sngi ban dang wan khamtam ha ki shnong ba don ha khappud bad ka Assam”.
