Nongstoiñ, Risaw 9: Ka Hill State Peoples Democratic Party (HSPDP), kala ioh mynsiem mynta ban iakhun ha kaban pynioh noh ia ka Khasi Jaintia State la ka jong na ka Jylla Meghalaya da ka jingioh jingkyrshan ka jingdawa Garo State ka Garoland State Movement Committee (GSMC) na ki 12 tylli ki kynhun ka ri India.
“Ka HSPDP kala ioh mynsiem ban nang pynskhem shuh shuh ia kawei na ki mat treikam u (L) Bah Hopingstone Lyngdoh kaba dei ruh ka mat treikam ba hakhmat duh jong ka HSPDP naduh bala seng ia ka” ong u Bah KP Pangniang, MLA barim bad President ka HSPDP.
Kat kum ka jingong jong u, ka Garoland State Movement Committee (GSMC) kala ioh mynta ia ka jingkyrshan halor ka jingdawa Garo State na ki 12 tylli ki kynhun ba na shabar ka Jylla ba kynthup ia ka Ladakh Bundelkhan, Vidanbha Purbanchal, Harit Pradesh Gurkhaland, Bodoland, Tripraland, Dimasa Karbi Mithila,Vidhya Pradesh, ki ban sa їasoh lang ha kawei ka kynhun ka National Federation for New State (NFNS) kaba la їalam da u Munish Tamang kum u president.
U bah Pangñiang u la ong ruh ba wat la u nongseng jong ka party um don shuh, hynrei ki mat treikam kiba u la iehnoh shadien ki dei ki nongrim kiba skhem kiba ka party kam lah ban klet bad ban shu sngap.
Nalor kata u la ong ba ha u snem ba la dep u la їoh lad ban їakynduh їa u nongїalam ka Garo National Council, kawei na ki seng saiñ pyrthei kaba ju їatrei lang bad ka HSPDP naduh mynshuwa, ha kaba utei u nongїalam ka GNC ryngkat ki dkhot ki la pynpaw ba ki kwah eh ban їatreilang bad ka HSPDP, namar ka GNC ruh naduh ba la seng ka la buh їa kawei ka mat treikam kaba hakhmat eh ba ka Garo State ka dei kaba don kam ban pynurlong.
Nalor kata u bah Pangñiang u la ong ruh ba ha katei ka jingїakynduh ki la їatai sani bha bad ki la їakut ba ka jingdawa їa ka Khasi Jaiñtia Sate da ka HSPDP bad ka jingdawa Garo Sate da ka GNC, kin long ki mat ba baroh ar tylli ki party kin їatreilang da ka jingїasngewthuh jingmut bad da ka jingїamynjur lang, ha kaba pynbeit їa ki pud ki sam, katkum ka jingkwah jong ki paitbah nongshong shnong, ban їatrei lang ryngkat ryngkat ha ka ban bishar bniah katkum u pud u sam uba la don naduh mynshuwa hapdeng ka West Khasi Hills bad ka East Garo Hills District.
U bah Pangñiang u la ong ba ha kane ka jylla ki don da ki phew tylli ki seng saiñ pyrthei kiba їakhih khohreh man ka por bad wat ki party riewlum ruh ki don bun tylli, hynrei kim shym pat la kynmaw ba ka Khasi Jaiñtia State ka dei ka lynti bah ban weng їa ka jingeh jong ka jylla, khamtam eh ha ka їoh kam їoh jam jong ki samla bad kiwei kiwei.
