Shillong, Jymmang 22: U Myntri Rangbah ka jylla Conrad Sangma ula iakynduh bad iakren bad ki 3 ngut ki nongkinglieng ne Kayakers ka jylla, ki ban leit mihkhmat ia ka ri India ha ki lympung iakob kiba heh jong ki Ri ka pyrthei (International).
U Myntri Rangbah ula iakynduh ia ka Elizabeth Vincent, Batskhem Nongbak bad Pynshngain Kurbah bad kine baroh 3 ngut kila shah jied ban mihkhmat ia ka ri India ha ki jingiakob kiban long ha kylleng ki ri.
Ka Elizabeth Vincent na Ribhoi ka dei ka kynthei kaba marwei na ka jylla kaba la shah jied ban iakhun ia ka ICF World Cup, Prague kaban long ha u Jylliew 2024.
Ki nongjop ha kane ka World Cup kin ioh ban iakhun ha ka Paris Summer Olympics 2024.
Haba iakren bad kine ki nongialehkai u Myntri Rangbah ula ong, ” Ka jingthmu ka jong nga ka long ban wan ban pynlut por bad ki bad ban ai khublei ia kine kiba la shah jied. Kum u Myntri Rangbah jong phi, nga dap da ka jingsngew sarong ia phi baroh khamtam halor ka jinglah ban lehkai bha tang ha ka por kaba khyndiat”.
U Myntri Rangbah ula plie ia ka Rafting Project ha ka shnong Umtham ha u Naitung 2023.
Kine ki 3 ngut ki nongking lieng mynta kila shah kynthup ha ka kynhun jong ka ri India ban iashimbynta ha ka International Canoe Slalom Tournament, kaban long ka ri Russia ha u Nailur mynta u snem.
Ka Elizabeth Vincent, 26 snem ka rta, kaba la ioh rung sha ka World Cup, kala sdang ioh jinghikai na u Coach uba dei ruh u Kpa jong ka u Ian Vincent hajan ka shnong Umtham. Kala mihkhmat ia ka Meghalaya ha bun tylli ki rynsan iakob kiba kynthup ia ka National Games, Malabar River Festival bad ka Tawangchu Tides Festival ha Arunachal Pradesh.
U Batskhem Nongbah 18 snem ka rta bad u Pynshngain Kurbah 19 snem ka rta, kila wan iashimbynta ha ka Khelo India Games 2022.
U Batskhem Nongbak udei na ka shnong Umtham bad ula ioh jinghikai na u Ian Vincent bad udei uba shu trei bylla uba don pat ia ka jingthrang ban kiew shaphrang ha ka kam ialehkai bad ban iakhun ha ki lympung iakob.
U Pynshngain Kurbah una na Labyrwa ula sdang ha ka rta kaba rit bad u Ian Vincent bad ula ioh khur ia ka Takma Rupa ha ka Khelo India Games 2022.
Ula leit ruh ban mihkhmat ia ka jylla ha ka Malabar River Festival & Events ha Madhya Pradesh.
U Conrad Sangma ulaniakren bad kine ki nongialehkai, ki Coach bad ki nongialam na ka jylla, ha kaba la iadonlang u Dr. Wilbur Manners, President ka MCA, u Bah Zorba Laloo dkhot jongka MCA bad u Coach Ian Vincent.
Ka shnong Umtham, Ribhoi kala kylla long ka jaka kaba la pynlong ia ki jingiakob ki bapher bapher kaba kynthup ia ka Megha Kayak Fest ka jingiakob ha kaba ki nongialehkai na kylleng ki ri kila wan ban iashimbynta bad ha kane ka jaka la pynlong 6 tylli ki jingiakob haduh mynta bad la pynlong ruh ia ka Rafting bad IKCA Selection Trials ha ka 18 bad 19 tarik u Jymmang 2024.
