Tura, Jymmang 22 : Ki Pulit ka Jylla kila ioh tam ia lai tylli ki metiap kynthup kawei ka Kynthei kaba la thiah lyngktar ha kawei ka jaka ha khappud ka West Garo Hills, ia kaba la suba jur ba ka dei ka kam jong ki nongkhaii tuh ia ki masi sha Bangladesh.
Kane ka kam bymman kala mih paidbah ha ka miet 17 bad 18 tarik Jymmang haba ki Pulit ka Dalu, kila ioh ia ka telephone na ka hospital ha ka por 2 baje mynstep, ha kaba u Doktor ula pyntip shaphang uwei u nongshongshnong bala wanrah iap sha hospital hapdeng ka jingmynsaw kaba jur bha.
Une u briew u dei na ka shnong Adanggre.
Ha ka jingtohkit, la lap ba 4 ngut ki trai shnong ka thain, ki dang leit sha ka shnong Matchokpara da ka auto rickshaw ha ka por shiteng miet bad lap ia artylli ki maxi pick up ba kit masi, kiba la phet krad namar ka jingwan iaid ka auto rickshaw.
Haba pynieng ia ka kali, kila iohi ia artylli ki masi kiba ieng hapoh khlaw marjan ka surok bad dei haba kila leit sha kane ka khlaw ban tan ia ka masi sha surok, kine ki briew kila shah thombor ha ki suba nong Bangladesh kiba la rieh hapoh khlaw.
U Ambarth Marak na ka shnong Adanggre, uba la mih na ka auto bad uba la leit rung sha khlaw ban tan ia ki masi, ula shah pom da ka kynja wait ha ki runar. La kit wut wut ia u sha Dalu CHC hynrei ula khlad noh ha lynti.
Ka Kynhun ki Pulit kala hiar ha katei ka jaka ba jia ka jingthombor bad kila pynlong ia ka jingkhynra kaba lam pat sha ka jingioh tam sa ia artylli ki metiap-kawei jong u shynrang bad kawei jong ka Kynthei.
Ki Pulit kila lap ruh ia ki jain ki nep, ki slipar ba da ki dorjon, ki tiar shet, ki jingdeng kti, ka wait bad ki nar rod na kane ka jaka.
Ki Pulit kila register case halor kane ka jingjia bad ka jingtohkit mynta kala iaid shakhmat.
