Shillong, Nailur 07 : Ka Jylla kala ioh lum ia ka khajna GST ba kot haduh T.772 klur hapdeng u bnai Iaiong haduh Nailar 2024.
Ka jingioh lum khajna ha kine ki juh ki bnai ha u 2023 ka long T.737 klur, kaba pyni ia ka jingkiew ba 5 % ha ka jingioh lum khajna, ong ka Tnad Pla tyngka ka Jylla ha ka kyrwoh ba pyllait hynne ka sngi Saitjain.
Ka jingkiew ka jinglum khajna jong kiwei ki Jylla ka thain Shatei Lam Mihngi ka long- Assam
7%, Arunachal Pradesh -8%, Manipur 11%, Mizoram 1%, Nagaland 0%, Sikkim -16% bad Tripura 11%, kala ong.
Ka kyrwoh ka ong ba ka Sorkar Jylla kala pynlong ia ki jingpynshai paudbah khamtam hapdeng ki dukan rit kiba thied ia ki mar na shabar ka Jylla, ban pynthikna ba kin shim ia ki invoice ba ai jaka treikam ha Meghalaya khnang ba ka GST kan poi sha Meghalaya.
Kala ong ruh ba ka jingbishar kaba bniah la leh halor ka return ban lah tehlakam ia ka jinglait ka khajna.
“Ha une u snem mang tyngka ba mynta, haduh 376 tylli ki case ba kot ia ka T.121 klur ki dang don hapdeng ka jingbishar” ong ka Tnad.
Kala ong ba ka jinglum GST ka Jylla kala iohi ia ka jingkiew ba 35.87%, 32.12% bad 16.66 % hapdeng u snem 2021-22, 2022-23 bad 23-24.
Ka jinglum GST kala kiew na ka T. 1118 klur ha u 2021-22 sha ka T. 1723 klur ha u 2023-24, kala bynrap.
