Ioh kyrdan ka USTM ha ka top 200 na ki University ka Ri India ha ka NIRF 2025

Shillong, Nailur 04: Ka University of Science and Technology Meghalaya (USTM) kala jam sha uwei pat u mawmer, ha kaba kala rung ha ka thup jong ka Top 200 Universities (151-200 band) hapoh ka ri India na ka bynta saw sien kynthih ha ka National Institutional Ranking Framework (NIRF) 2025.

Kane ka jingioh jingithuh kadei ka jingpynshisha ia ka jingtrei borbah ka USTM ha kaban ai ka jinghikai kaba paka ha ka pule puthi bad kaj ingbteng ban trei shitom ban leh ia kaei kaei kaba thymmai.

Ka jingioh kyrdan ha ka NIRF kadei kaba la pynshong nongrim katkum ka jingkhmih bniah ha ki liang bapher bapher, kaba kynthup ia ki jingai jinghikai bad ka jingpule, ka jingwad bniah bad ka jingleh kiba tbit, ka jingmih na ka jingpyndep ha ki Graduation, ki prokram bad kiwei kiwei.

Ka jinglah ka USTM ban leh bha ha kitei ki bynta kala pynlong ia ka ban ioh ia ka jaka ha ka thup jong ki skulbah kiba tbit hapoh ka ri.

Kum ka skulbah kaba nyngkong bad kaba la pyniaid da ki riewshimet hapoh ka thain shatei lammihngi kaban ioh ia katei ka kyrdan.

“Ka jingsngewnguh ka leit sha ka sorkar Meghalaya halor ka jingai jingkyrshan naduh ka sngi kaba nyngkong, ka jingiohi jngai hapoh ka jingialam u Chancellor Mahbubul Hoque bad Vice Chancellor Prof. G.D. Sharma, kiba la bteng ban trei shitom ban pyniaid shakhmat ia ka USTM. Khublei shibun ia kak ynhun jong ki nonghikai, ka jingkyrshan na ki kmie ki kpa, ki samla pule kiba don ia ka jingthrang bad kane ka jingangnud ka jongki bad ka jingngeit kala wanrah ia ka jingkylla” la pynpaw ka skulbah ha ka kyrwoh khubor hynne ka sngi Palei.

Ka USTM mynta ka don ia ka jingthmu ban poi noh sha ka Top 50 universities hapoh ka ri India hapoh jong u snem ban wan, lyngba ka jingioh ia ka jingkyrshan na ka sorkar Meghalaya.

Lyngba ka jingaiti bad ka jingtrei shitom, ka USTM kala ong ba ka don ia ka jingngeit kaba skhem ban kynjoh ia ka thong bad ban nang pynskhem ia la ka kyrdan kum ka skulbah kaba biang tam hapoh ka ri.