Imphal, Nohprah 28 : Ki shipai ka Assam Rifles ha ka 27 tarik mynta u bnai kila lah ban pynpulom ia ka jingthmu khaii drok beain lyngba ki jaka khappud da kaba ioh ban kurup noh ia u drok uba shongdor haduh kumba T.12.60 klur na Moreh district ka Manipur.
Nalor kane, ki shipai Assam Rifles na ka Changlang Battalion ha ki artylli kiwei pat ki jingkhynra kila ioh ban kem noh ia arngut ki dkhot jong ka seng kieng atiar Eastern Naga National Government (ENNG) na Changlang district ka Arunachal Pradesh.
“Hadien ba la ioh ia ka jingtip kaba bniah lyngba ki tyllong khubor, ki shipai ka Assam Rifles ha ryngkat ki bor pulit ka Changlang kila pynlong ka jingkhynra bad ioh ban kem noh ia arngut ki dkhot jong ka seng ENNG kiba dang leh ia ki kam beain hapoh ka thain,” ong u nongaiktien ka tnat shipai.
Hadien la aiti noh ia kine ki arngut sha ki bor pulit ka Changlang na ka bynta ban bteng shuh shuh ia ka jingtohkit.
Kham hashwa, kata ha ka 22 tarik mynta u bnai, ki bor pahara ha Arunachal Pradesh kila ioh ban kem mar uwei u dkhot jong ka kynhun kieng atiar United Liberation Front of Assam (Independent) bad NSCN (K-YA) na ki bynta jong ka Tirap bad ka Longding districts ka Arunachal Pradesh.
