Guwahati, Naiwieng 23 : Ki bor pulit ka Assam kila ioh ban kurup ia u drok uba shongdor bun klur tyngka na ki bynta jong ka Cachar, ong ka khubor heh pulit ha ka sngi Nyngkong ba la lah.Halor kane ka jingjia la ioh ruh ban kem noh ia san ngut ki briew kiba la shah kynnoh donkti ha kaba thmu ban khaii beain.
Shwa kane laingut ki briew kila shah kem noh na Cachar ha ryngkat 1.80 lak tylli u drok tablet ha ka sngi U Blei ba la lah, kata na ki bynta jong ka Lakhimpur jong ka district. Ki bor pulit kila ong ba kine ki drok ba la ioh kurup ki shongdor haduh kumba 50 klur tyngka ha ki jaka iew beain jong ka pyrthei.
Kine ki briew kiba la shah kem noh ki dei kiba la tip kyrteng kum u Abdul Saeed, Ibazur Rahman bad u Sameer Alam, baroh laingut kiba dei napoh Cachar district.
Na ka liang u Superintendent of Police ka Cachar district, u Numal Mahato ula ong ba kine ki laingut ki briew kila pynkit ia une u drok tablet da kawei ka kali.Ia kine ki drok la thep ha ki bynta jong ka kali ba la shna kyrpang.
Hadien ba la ioh ia ka jingtip kaba bniah, laingut ki briew kila shah kem noh bad ha ka jingkhynra ia ka kali la ioh ban kurup noh ia une u drok.Nalor kata utei u heh pulit ula pyntip ruh ba ha ka jingtohkit kaba mynta hi la ong ba u Abdul Saeed ula wanlam ia kine ki drok tablet napoh Churachandpur district kaba marjan bad ka Manipur.Ka jingthmu ka long ban shalan beain ia une u drok shabar jong ki ri ka pyrthei.Ka jingtohkit kaba bniah mynta ka dang iaid shakhmat, ong u heh pulit.
