Aizawl, Risaw 15 :Ha kawei na ki jingjop kaba khraw ha ki kam ialeh pyrshah drok, na ka liang ki bor pulit ka Mizoram kila ioh ban kurup ia u drok heroin uba shongdor haduh kumba T.34 klur.
Ia une u drok uba don ka jingkhia kaba 6.836 kilo la ioh ban kurup na ki 500 tylli ki song sabon da ki bor pulit ka Mizoram.Une u drok bala ioh kurup la ong ba u shongdor haduh kumba T.34.18 klur ha ki jaka iew jong ki ri ka pyrthei.
“Kane ka dei ka jingioh kurup drok kaba heh tam ha ka histori ka jylla,” ong ka tnat pulit ka Mizoram.Ia une u drok la ioh ban kurup na ki bynta jong ka Champhai district ka Mizoram.
Ka jingioh kurup ia une u drok kala wan long ruh hadien ba ki bor pulit kila pynap shrip bad ioh ban bat noh ia kawei ka kali (taxi) kaba pynkit ia une u drok.
U nongniah jong kane ka kali ula shah kem noh bad la aiti ia u sha ki bor pulit ka Champhai police station ha Mizoram.
Na ka liang ki bor pulit ka Mizoram kila ong ba ia u nongniah jong kane ka kali la ioh ban kem noh bad la rejistar case pyrshah ia u hapoh Champhai police station, bad mynta ka jingtohkit kala iaid shakhmat.
