Bokajan, Naiwieng 15: Ha ka jingialeh kaba dang iai bteng ban pynlong ia ka Assam ka jylla kaba lait na u drok, na ka liang ki bor pulit ka Assam kila ioh ban kurup kumba 685 gram u drok heroin uba shongdor kumba 1 klur na uwei u briew uba dang iai lyngba ka lynti rel hajan Matipul railway crossing kaba hap hapoh Khatkhati police stationha Karbi Anglong district ka Assam.
“Hadien ba la ioh ia ka jingtip kaba bniah, ka kynhun nong ngi kala ioh ban kem noh ia uwei u briew uba dang iaid lyngba hapoh ka lynti rel.Ha ka jingtalasi la lapdien ia ki 55 tylli ki synduk sabon.Kine ki synduk ki don ia 685 gram u drok cocaine,” ong u John Das, uba dei u SDPO ka Bokajan.
Ia utei u briew ba la ioh kem la tip kyrteng kum u Nawaj Khan 21 snem rta uba dei u khun jong u Abdul Jaynal napoh ka shnong Kwakta kaba hap hapoh Bishnupur district hapoh Manipur.
Na ka liang ki bor pulit kila pynjur ia ka jingpahara ha ki jaka khappud ha Khatkhati bad Dillai hapoh Karbi Anglong khnang ban khanglad ha kaba iadei bad ki kam khaii drok nalor kiwei pat ki kam khaii beain napoh Nagaland sha ki bynta ka Assam kaba la pynlong ruh ia kine ki nongkhaii drok ba kin pyrshang da ki buit kiba thymmai na ka bynta ban pyniaid iew ia u drok napoh ka jylla.
“Hadien ba ula ioh ban wan sha Assam na Nagaland, utei u briew ula iaid lyngba ia ka lynti rel na ka bynta ban pynpoi ia utei u drok sha ki bynta ka Bokajan,” ong u Das.
