Aizawl, K’lyngkot 14 :Ha ka thma iakhun pyrshah drok kaba dang iai bteng, ki bor pulit hynnin ka sngi kila ioh ban kurup ia shibun bah u suba drok heroin bad kem noh ia sangut ki briew kaba kynthup ia uwei u nong Myanmar na ki bynta ba pajih jong ka thain Luimawi kaba hapoh Mizoram.
Katkum ki khubor la ong ba ki bor pahara ha ryngkat ka jingiadon lang ki dkhot na ka tnat CID (SB) bad ki bor pulit na Kanhmun PS (Mamit District) hadien ba kila ioh ia ka jingtip kaba bniah ki la pynlong ka jingap shrip bad bat noh ia kawei ka trok ba la niah da uwei u briew ba la tip kyrteng kum u Lalrinfela (35 snem rta ) uba dei na Zotlang, Aizawl na ki bynta ba pajih jong ka thain Luimawi kaba hapoh Mamit District bad ioh ban kurup kumba 1.161 Kilo u suba heroin ia kiba la thep ha ki 89 tylli ki synduk sabon, bad hadien ka jingbishar bniah la ong ba une u drok u shongdor haduh kumba T. 5.8 klur ha ki jaka iew beain jong ki ri ka pyrthei.
Nalor utei u nongniah, kiwei pat kiba la shah kem noh ki kynthup ia u Lalsangkima (39) uba dei na Ramrikawn Aizawl, Lalfelpuia (35) na Zokhawthar, Sanglianthawn (36) na Pyinkhonegyi, Myanmar bad u Lalrinchhana (32 snem rta) uba dei naVairengte Chhimveng.Nalor kata la rejistar case pyrshah ia kine ki briew hapoh Kanhmun PS bad ka jingtohkit mynta ka dang iaid shakhmat.
Kham hashwa ki bor pulit na Vairengte Police nalor ki dkhot na ka tnat 225 Bn CRPF, 147 Bn CRPF bad na ka tnat CID SB Aizawl ki la lapdien ia kawei ka kali bad ioh ban kurup haduh 194 kilo u dawai kuli Pseudoephedrine tablets (COLZEN Tablets) ha ka 7 tarik mynta u bnai napoh kawei ka kali ha Vairengte Kawngthar Veng auto stand.
