Tura, Naitung 26: Ki pulit ka West Garo Hills, hynnin ka sngi nyngkong, kila ioh kurup kumba 3000 tylli ki dawai kuli droks na ki arngut ki samla kiba dang wanrah ia kine ki jingdih pynbuaid na Mankachar, Assam ban pyniaid iew ha Tura.
Halor ka jingioh jingtip ba kin don ki briew ba thmu pynpoi droks na Mankachar, ki pulit ki la pynieng ia ki jaka talasi kali ha bun tylli ki jaka hajan Tura ban ioh kem ia kine ki briew.
“Ha kane ka jingpynap shrip, kawei ka thuk thuk yamaha ba don u nombor ML-08-G-723 kala wan iaid lynti bad la bat ban talasi bad ha ka jingtalasi ngi la lap pynban ia kine ki dawai droks ba kynthup ia 2856 tylli ki dawai spasmo proxibon bad 10 tablet u nitrazapem”, ong u Superintendent of police VS Rathore.
Kat kum ka jingong jong u, ia kine ki briew lah ioh ban bat hajan Ghoramara, Garibadha Police Investigation Centre bad lah tip kyrteng ia ki da u Rex John K sangma ba sah ha Ringre Gittim, Tura bad u Bishal Ch Marak ba na lower balsarang, Tura.
Halor kane ka jingjia, ki pulit kila register case ia kine ki samla hapoh ka NDPS act bad ka jingtohkit ka la iaid shakhmat ban lapdien ia ki briew kiba don jingiadei bad ka jingwan pynpoi ia u droks nalor ki kingpin.
