Nongpoh, Rymphang 28 : Ka Shnong Nongkhrah, Ri-Bhoi District, hynne ka sngi Balang, kala ioh ia ka iingdorbar ba thymmai kaba la tei lyngba ka skhim SRWP bad ka song pisa ka Tnad Urban Affairs haduh T. 10 lak.
Ia kane ka Iingdorbar la plie paidbah da u Symbud Myntri Rangbah ka Jylla Bah Prestone Tynsong ha ka jingiadonlang u ADC ka Ri-Bhoi Raja Brahma, u Secretary ka Nongpoh Town Committee (NTC) Bah Rayonald Kharkamni, Adviser ka NTC Bah CB Syiem, Chairman ka Synjuk ki Rangbah Shnong Bah BB Makdoh, bad kiwei kiwei.
Haba ai jingkren ha ka jingialang, u Bah Prestone la ai ïaka jingïaroh ïaki Nongialam Shnong ba ki la treihok ïa ka kam ban wanrah ïaki kam pynroi hapoh ka shnong ka thaw bad u la ong ruh ba ka jingïoh ban plie ïaka Ïing Dorbar ba thymmai ka long kum kawei na ki kam pynroi bad lyngba kane ka Ïing Dorbar ki Nongialam Shnong kin ïoh ban saiñ dur ïaka Shnong ka thaw lyngba ki kam jong ki.
U Bah Prestone u pynpaw ruh ka jingiaroh ïaka sorkar jylla kaba la lam khmat da u Myntri Rangbah la Jylla u Conrad Sangma, ba dei lyngba ka jingstad bad ka jingshemphang jong ki Myntri kiba don haka Sorkar, la lah ban wanrah shibun ki kam pynroi hapoh ka Jylla baroh kawei.
Ki Nongialam Shnong ki la ai ka jingkhublei iaka sorkar kaba la sngap ïaka jingdonkam jong ka Shnong bad lyngba ka jing ïoh ban plie noh ïa kane ka ïing Dorbar kaba thymmai ki Nongialam Shnong ki kyrmen ba kin dang lah ban pyntyllun shakhmat ïaki kam Shnong kam thaw.
