Shillong, Naitung 21 : Ka Myntri ka koit ka khiah kong Ampareen Lyngdoh, kala pynbna ia ka jingnang iaid shaid shaid ki kam ba iadei bad ka jingseng ia ki Medical College ha Shillong bad Tura.
Ka Shillong Medical College kala nang jam shakhmat ha ka jingpynbiang ia ki jingdonkam baroh bad u Myntri Rangbah u don ia ka jingmut ban pyndep noh ia baroh ki jingdonkam bad ban sdang noh ia ka College kham kloi kat kaba lah.
“Ngi deo ban lah ha kaban pyndep ia ka thong jong ka jingai jingmut kaba mynta kat kum ka jingpynbna ka NEET. La bthah ia ka Institute ba kan sdang ia ka NEET counselling bad ka Tnad ka Koit ka Khiah ka Sorkar Jylla kan sa pynbna ia kane ka jingpynbna ha kine ki sngi ban wan. Ngi kyrmen ba ngin sa lah ban sdang noh ia ka Shillong Medical College” ong ka kong Ampareen.
Ka pyntip ba ka jingpynrung kryteng ban pyniasoh bad ka North Eastern Hill University (NEHU) kala dep pura bad ka College ka ap mynta satang ia ka Letter of Permission (LoP) ban sdang noh ia snem pule doktor ba nyngkong.
Ka Myntri kala pynpaw ba ki interview kila nang iaid shakhmat mynta na ka bynta ki artylli ki tnad ba kongsan bad ka college kala nang leh ia ki kam kiba kongsan ban pynkhlain ia ka jingdon ki nonghikai, khamtam ki jingdonkam ha ka clinical.
“Ngim khmih lynti ba kan don kano kano ka jingartatien ba ngin lah ban sdang noh ia ka course hynrei ka LoP ka long kaba kongsan kaba donkam ban ai sha ka Sorkar Meghalaya shuwa ba ngin pynsdang noh ia u snem pule ba nyngkong ha ka Shillong Medical College” kala bynrap.
Halor ka Tura Medical College, ka Myntri ka pyntip ba ka jingpyntrei ia ka College kala iaid shaid shaid bad kumba 78% ki jingtrei kila dep.
Ka pyntip ba ka Sorkar kala pyntrei da ka Public Private Partnership (PPP) model ban pyniaid ia kane ka college, bad ia ka jingtyrwa la khmih lynti ban sa ai jingmynjur shen da ka Kynhun Myntri.
“Ka mat ba kongsan eh ha kaban pyniaid ia ka Tura Medical College ka long ba ka Sorkar kan shim ia ka rai halor ka model jong ka PPP mode, kaba thmu na ka bynta kane ka college” ong ka kong Ampareen.
