Shillong, Lber 22: Ka Physical Medicine & Rehabilitation (PMR) Centre kala wanrah ha ka than shatei lammihngi ia kaba nyngkong eh ka Wheelchair-Accessible Vehicle ha Shillong, da ka jingthmu ban pynsuk ia ka leit ka wan jong ki briew kiba don jingduna ha ka dkhot met.
Ka Dr. Lahunlang M. Sohliya, Director jongka PMR Centre, kala pynshai ia ka jingthrang kaba la don halor katei ka jingthmu, da kaba pynpaw ia ki jingeh kaba la mad da ki riewshimet kiba don jingduna ha ki dkhot met.
“Kiba bun ki nongpang ki shem jingeh ban leit shim dawai ne ban leit sha ki iingmane ne ban leitkai sha iing ki paralok. Kala ktah bha ia ka jinglong ha ka met ka phad ka jongki bad ia ka bor pyrkhat ka jongki, kaba lam sha ka jingsngew marwei. Kane kadei kata ka jingmut jingpyrkhat kaba la mih” kala batai.
Ka kali Kia Carens ka ngiam haduh 6 ngut kynthup ia kawei ka kali Wheelchair. Ka bynta kaba kongsan kadei ka jingdon ia ka ‘Ramp’ kaba ar mitar ban pynsuk ia ka jingpynrung ia ka Wheelchair ia kaba lah ruh ban teh, ki seat belt ia baroh kiba shong hapoh ka kali bad ka jingkylluid ka jaka ban pynthikna ia ka jingsuk kiba shong hapoh ka kali.
Ka Dr. Sohliya kala pyntip ba ia kane ka projek la lah ban pynurlong lyngba ka jingioh ia ka grant na ka PRIME Meghalaya bad ka jingkyrshan jong ka Myntri ka koit ka khiah ka Dr. Ampareen Lyngdoh. Nalor katei ka jingnoh synniang, la pynlut ruh nalade ban pyndep ia ka jingshna pynbha ia ka kali.
Kala banjur ba kane ka kali kadei tang ka jingsdang, “Lada shem ba ka long kaba ai jingmyntoi bha, ngi ngeit skhem ba ka sorkar kan ai ia ka jingithuh bad kan pyniar shuh shuh ia ka. Nalor ka jingleit jingwan, ngi kwah ruh ban shimkhia ban lah ban pynpoi sha ki jaka mane Blei, ki jaka ha ka imlang sahlang bad ki jaka bam” ka la ong.
Kumba long mynta, ki nongshong shnong ki lah ban ioh pyndonkam ia katei ka kali da kaba phone ha u 708-523-5036. Ka jingthmu ban buh ia ka Application ne ka App ka dang don ha ka jingpynkhreh bad ka don ruh ka jingthmu ban shim ha ka dor kaba biang ban pyndonkam ia kane ka kali, khnang ban pynthikna ba kin kot bor.
Ka Rinalin Nongdhar kaba pyndonkam iaka Wheelchair na ka Bethany Society, kala pynpaw ia ka jingsngewnguh, “Kane kadei ka sienjam kaba khraw ban pynsuk ia ka leit ka wan. Kadei ka jingpynkup bor ia ki briew kiba kum ma ngi. Nga ai khublei ia ka Dr. Sohliya bad ia ka iing ka sem jongka halor kane ka sienjam”.
Nalor kane, kala pynpaw ruh ia ki jingeh ha ka leit ka wan ha ka nongbah Shillong, ia ka jingdon ia ki surok ki bym shngain bad ka jingbym ioh pyndonkam ia ki lynti iaidkjat (footpath).
“Lada ka sorkar ka pyntreikam ia ki lynti iaid kjat kiba lah ban pyndonkam, kan pynkylla iaka jingshem ka jong ngi” kala ong.
Ka Dr. Sohliya bad kiwei kiwei kiba la iadonlang, kila banjur ia ka jingdonkam ka sorkar ban shim ia ki sienjam halor katei ka bynta.
“Katba kiwei pat ki jylla kum ka Delhi bad Bangalore ki don ia kum kitei ki kali, ngi lah ban ieng ban pynbha shuh shuh ia ka leit ka wan, khamtam na ka bynta ki nongjngohkai kiba don jingduna ha ka dkhot met. Kane kan kyntiew ia ka dur ka jong ngi kum ka jylla kaba pdiang sngewbha”.
Ha kane ka jingialang la wan ban iashimbynta da ki nongmihkhmat na ki kynhun bapher bapher kiba kynthup ruh ia u kongsan u Rev. Dr. R.R. Cunville bad Rev. Terence Wanshong uba la shah khot kyrpang, kiba la ai ka jingiaroh ia kane ka sienjam.
 Centre kala wanrah ha ka than shatei lammihngi ia kaba nyngkong eh ka Wheelchair-Accessible Vehicle ha Shillong, da ka jingthmu ban pynsuk ia ka leit ka wan jong ki briew kiba don jingduna ha ka dkhot met.){kind=link}