Shillong, Lber 19 : Ka Nonglum khubor na Nongbah Shillong Princess Giri Rashir, kala ioh ia ka khusnam Ramnath Goenka halor ka jingtbit jong ka ban lum bad ai khubor halor ka mariang, saian bad technology.
Ka khusnam kaba la ai halor ka khubor bala pynmih ha u 2021 bad 2022, la aiti da u Kongsan Niton Gadkari, Myntri ka Sorkar pdeng ba khmih ia ka Ministry of Road Transport and Highway, ha ka jingialang kaba long ha ka sngi Ba-ar ha Delhi.
Nalor kane ka khusnam, ka kong Rashir kala ioh ruh ia ka song pisa ba T 1 lak.
Ka khubor jong ka Kong Rashir bala pynmih ha ka Eastmojo bad ba ai kyrteng “Choking amid coking: Meghalaya coke factories leave no room to breathe” kala ioh ia ka jingithuh halor ka jingpyni ia ki jingktah jong ki karhana coke beain kiba don hapoh ka Jylla Meghalaya.
Kane ka khusnam bala pynmih da ka Ramnath Goenka Foundation, ka dei kaba ai jingithuh bad pynkup burom ia ki nongthoh khubor kiba tbit tam ha ki 13 tylli ki bynta ba kynthup ia ka investigative journalism, sports, politics & government, books, feature writing, bad regional language.
Ki nongbishar jong kane ka jingai khusnam ki kynthup ia u Justice B N Srikrishna, Prof. (Dr) C Raj Kumar, Dr SY Quraishi, bad K G Suresh.
