Nongstoin, Naiwieng 24 : Ka Nongstoin Social Service Society (NSSS), kawei na ki seng trei mon sngewbha ka Meghalaya, ka la ioh ka ka Mahaveer Award ba la ai da ka Bhagwan Mahaveer Foundation, Chennai.
Ka NSSS ka la shah jied na ka thup ‘Community & Social Service’ napdeng ki spah tylli ki NGO jong ka Ri India.
Ka NSSS kala ioh jingtip ia kane ka jingioh khusnam naduh ka 26 tarik u Nohprah 2022 bad la pyllait khubor paitbah ha ka 12 tarik u Kyllalyngkot 2023 hynrei ia ka khusnam la sam ha ka 23 tarik u Naiwieng 2023 ha Chennai da u Lat ka Tamil Nadu R. N. Ravi, Governor ha Raj Bhavan, Chennai ha ryngkat ka jingdon lang u Founder (Nongseng) bad ki Trustee jong ka Bhagwan Mahaveer Foundation.
Ia kane ka khusnam ka NSSS la leit pdiang da u Fr. James Anderson Syiemlieh uba dei Director barim ka NSSS bad u President bathymmai jong ka NSSS, ha ka jingdonlang u Fr. Roland Lyngdoh u President barim jong ka NSSS, u Fr. Ditendar Lyngkhoi u Director Bathymmai jong ka NSSS bad u Fr. Seberin Lyngdoh u Treasurer jong ka NSSS.
Kane Award ka kynthup ia ka 10 lakh tyngka ka pisa, ka Citation (syrnot) bad ka Memento (jingsahkynmaw).
Ha kane ka sngi la sam ruh ia ki Award sa sha ki 3 tylli ki seng kiba kynthup ia ka Dhyan Foundation, New Delhi (jong ka thup Non-violence & Vegetarianism), Friends of Tribals Society, West Bengal (jong ka thup Education) bad Jan Swasthya Sahyog, Chhattisgarh (jong ka thup Medicine).
Na ka liang jong ka NSSS, la ai khublei ia baroh kito kiba la iarap sbun ban ioh iane ka burom bad ka kyrpad ia ka jingkyrkhu bad jingkitbok jong phi baroh ba kan nang iai lah ban bteng ban ai ka jingshakri ia kiba bun.
