Shillong, Naiwieng 29 : U MLA ka Nongpoh Bah Mayralborn Syiem ha ka sngi Thohdieng, ula pyntip ba ka Sorkar kala dep pyllait ia ka song pisa ba T.49,53,75,500 ha ka phase-I ban maramot ia ka surok Nongpoh-Umden ba 20 Km.
Kat kum ka jingong jong u, ki don palat 200 tylli ki shnong kiba don ha shilynter jong kane ka surok.
Haba kren sha ki lad pathai khubor, u bah Mayral ula ong ba ka Sorkar kala dep ban ai jingmynjur bad mang pisa ba pyntrei ia kane ka surok kaba la sah teng mynta la 2-3 snem.
Ula ong ba ka surok Nongpoh-Umden-Sonapur ka pyniasoh ia kumba 150-200 tylli ki shnong bad ha kine ki 2-3 snem bala lah, ki paidbah bad ki nongleit nongwan kila sajia bha namar ka jingsiew palat jong ka surok.
“Nga kmen ban pyntip sha phi ba ha kaba iadei bad ka bynta ba nyngkong jong ka project kaba dei na Nongpoh sha Umden kaba jngai kumba 20 Km eiei, ka Sorkar kala dep ai jingmynjur bad mang ia ka pisa ba T.49.54 klur” ong u Bah Mayral.
Haba iadei bad ka wat kaba ar ne phase-II jong kane ka project kaba dei na Umden sha Sonapur, kaba jngai kumba 38.6 Lm, u pyntip ba ka jingmang pisa ka dei kaba la mynjur naduh ka 10 tarik Risaw 2024 lyngba ka skhim PMGSY-III kaba kot haduh 47.20 klur.
U pyntip ba ia ka tender jong ka surok Umden-Sonapur la dep ban khot bad lehse ha ka taiew ba nyngkong u Nohprah 2024, yn sa ai noh ia ka work order sha ki kompani ne contractor kiba pynbiang ia baroh ki jingdonkam.
U Bah Mayral u pyntip ba kane ka project kaba jan kot T.100 klur, ka dei kaba la buh ban pyntrei ha u 2023 hynrei namar ka elekshon MP bad namar kiba bun ki kam khamtam ka jingduna pisa, ym shym la lah ban pyntrei ia ka.
“Haor kane, nga kwah ban pynpaw ia ka jingsngewnguh ia u Myntri ba khmih ia ka tnad PWD Bah Prestone Tynsong, ia u Myntri Rangbah ka Jylla bad ia ka Sorkar kiba la sngap ia ka jingkyrpad ki paidbah bad ka jong nga kum u MLA ban mang pisa ia kane ka surok kham kloi kat kaba lah” ula bynrap.
