Nongpoh, Naiwieng 29 : Ki Nongialam ka United Democratic Party (UDP) kila phaikhmat sha ka samla Naphishisha Marwein ban long kum ka kyrtong jong ka party na Umroi Constituency, ka ban aireng ha ka elekshon MDC ha u snem 2025.
Kane kala paw shai na ka jingialang jong ka UDP ba long hynne ka sngi Thohdieng ha Umroi Madan ban pdiang burom ia ka jingwan pyniasoh jong ki nongialam bad ki nongkyrshan na ki party bapher bapher kynthup ka NPP, TMC, Congress bad kiwei kiwei.
Ia kine ki nongialam ba wan pyniasoh la pdiang da u General Secretary ka party Bah Jemino Mawthoh ha ka jingiadon lang u MLA ka Nongpoh Bah Mayralborn Syiem, MLA ka Mawkyrwat Bah Renikton Tonghar, ki MDC ka KHADC Bah Balajied Rani bad Bah Titosstarwell Chyne nalor kiwei kiwei.
Ki Nongialam ka UDP kila pynithuh ia ka samla Naphishisha Marwein, 26 snem ka rta kaba dei ka nongshong shnong na Khweng, Umroi, kaba la pynpaw ia ka jingangnud ban mih aireng ha ka elekshon MDC na ka ticket ka UDP.
Ki Nongialam ka UDP kila pynpaw ia ka jingkmen ban sakhi ia ka jingwan pyniasoh ki nongialam bad ki nongkyr shan na kiwei ki party ha Umroi constituency bad ong ba kane ka pyni ia ka jingshaniah jong ki paidbah ia ka party kaba dei ruh ka seng riewlum kaba hehduh hapoh ka Jylla.
Kila kyntu ia ki nongialam bad ki nongkitkam ba ki trei shitom ha ka elekshon MDC ban lah pynthikna ba u/ka kyrtong ba pynieng da ka party, kin ioh ia ka jingjop.
