Nongpoh, Jymmang 02: Ka Civil Hospital Nongpoh kala ioh mynta ia ka shnat treikam ba sumar kyrpang ia ki Khunlung ba dang shu kha, kiba pang ba shitom, ia kaba la tip kum ka Special Care New Born Unit (SNCU).
Ia kane ka shnat treikam la plie paidbah ha ka 1 tarik Jymmang 2024 bad kan dei ruh ka SCNBU kaba nyngkong eh ban don ha ki Civil Hospital kiba don hapoh ka Jylla.
U Dr. HB Buam, paediatric bad Incharge ka SNCU, u la iathuh, ba ki bor pyniaid ka Nongpoh Civil Hospital, ki la don ka jing thmu ban wanrah ia ka SNCU mynta la katto katne snem bad dei ha u ne u snem 2024 la lah ban pynurlong ia kane ka jingthmu, ka ban ai jingsumar ia ki Khunlung ba dang shu kha khlem kano kano ka jingsiew.
U Dr Buam ula iathuh ba ki don bun ki Khunlung ba dang shu kha, kiba don ia ka jingpang stem, ki bym iam bad kiwei kiwei bad kane ka jaka sumar ka dei kaba buh kyrpang ban sumar ia kine ki Khunlung.
“Mynshuwa haba wanrah ki Kmie Kpa ia ki Khunlung ba pang stem ne kiwei kiwei ki jingpang, ngi hap ban phah ne pynkynriah ia ki sha Bethany Hospital ne sha Shillong. Kane kala wanrah jingeh ia ki Kmie Kpa khamtam kiba wan na ki longiing kiba duk namar ki hap ban pynlut pisa” ula ong.
“Hynrei, mynta ka lad jingsumar kala don hapoh ka Hospital bad ki Kmie Kpa kiba dang shu ioh Khunlung kim donkam shuh ban khuslai namar ka jingsumar ruh ka dei ka bym donkam jingsiew eiei” ula bynrap.
.){kind=link}