Shillong, Naiwieng 30 : Ka Jylla Meghalaya kala ioh ia ka song pisa ba T. 198.5 klur n aka ‘Special Assistance to State for Capital Investment-Development of Iconic Tourist Centres to Global Scale” scheme-2024-25 ban tei ia ki jingtei kam jngohkai ha Umiam bad Mawkhanu.
Ka Jylla Meghalaya ka dei kawei na ki 5 tylli ki Jylla kiba ioh ia kane ka skhim. Ka Meghalaya kala tam ia baroh ki Jylla ka thain Shatei Lam Mihngi bad kiwei ki Jylla ba heh hapoh ka Ri, kibym shym la ioh satia ia ka song pisa ba palat ia ka T.100 klur lait noh ka Assam.
Kane ka song pisa ka dei shibynta na ka song ba T. 3,295.76 bala sam bhah sha ki 23 tylli ki Jylla ha kylleng kaRi, da ka jingthmu ban pyntrei ia ki jingtei kiba kot kyrdan bad ki jingtei ka pyrthei nalor ban kyntiew ia ka ioh ka kot jong ki Jylla.
Kane ka song pisa kan kyrshan ia artylli ki project kiba la tyrwa da ka Tnad Tourism : Ka jingshna pynbna bad pynitynnad ia ka pung Umiam bad ka jingshna ia ka jaka jngohkai ha Mawkhanu, ia kiba la mang mar T. 99.27 klur.
Ka jingpynwan dur thymmai ia ka pung Umiam
Ka Pung Umiam, ka spah mariang kaba pyniapmat ia ki nongjngohkai ba wan sha Meghalaya namar ka jingitynnad ka sawdong sawkun, kan sa kylla long kawei na ki jaka jngohkai kaba khring duh. Ka project ka kynthup ia ka craft village, arts and culture pavilion, botanical garden, amphitheatre bad ki jingtei kiba donkam kum ka surok bad kiwei kiwei.
Ka pung umiam kaba khring haduh 16,222 ki nongleit kai ha ka shisnem, mynta la khmih lynti ba kin don haduh 1,27,750 ngut ki nongshangkai ki ban wan ha ka shisnem hadien bala dep pyntrei ia kine ki project. Kane ka project la khmih lynti ba kan ai kam haduh 1168 ngut ha kine ki project bad 2675 ngut ki ban ioh kamai lyngba jongki.
Ki jingtei ia ki kam jngohkai ha Mawkhanu
Ki jingtei kiba la tyrwa ban pyntrei ha Mawkhanu ki kynthup ia ka Meghalayan Experience Theme Park, Festival Ground bad Amphitheatre nalor kiwei kiwei ki jingtei ba kongsan. Kane ka jaka ban long ruh ka jaka ban pynlong noh ia ki tamasa kum ka Cherry Blossom Festival, ki tamasa iaput iatem, ki tamasa dei riti bad kiwei kiwei.
Kane ka project ka lah ban aikam haduh 1016 ngut ki briew ki ban trei ha kine ki project bad 2327 ngut ki ban sa ioh kamai na kiwei kiwei ki kam lyngba kitei ki project.
U Myntri Rangbah ka Jylla Conrad K Sangma ula pynpaw ia ka jingsngew sarong halor kane ka jingjop jong ka Jylla bad ong “Kane ka mang pisa ka pynskhem ia ka jingaiti met bad mynsiem jong ka Sorkar Jylla ban ban pynlong ia ka Jylla kum ka jaka jngohkai kaba iaryngkat kyrdan bad kiwei ki jaka jngohkai ha ka pyrthei bad ka jaka jngohkai kaba khring duh. Kine ki project ym tang ba kin kyntiew ia ka ioh ka kot hynrei kin iarap ban ri bad sumar iala ki jong ki riti dustur, ka dei riti naka bynta ki pateng ban wan”.
