Shillong, Naiwieng 29 : Ka North Eastern Hill University Teachers’ Association (NEHUTA) ha ka sngi Thohdieng, kala thalain tyngeh ia u Vice Chancellor Prof Prabha Shankar Shukla halor ka jingpyrshang ban kynnoh ia ka Seng, ka Sorkar Jylla, ki Samla Pule bad ki Nongtrei halor ki kynrum kynram ba jia ha NEHU.
Kane kala mih shisngi hadien ba u Prof Shukla ula pan ia ka jingpahara kaba biang na ka Sorkar Pdeng hashuwa ba un wan shimti biang ia ka shuki VC ka NEHU ha ka 2 tarik Nohprah, wat hapdeng ka jingiakhih ba dawa ban wengkam noh ia u.
Ha ka kyrwoh, u President ka NEHUTA Prof Lakhon Km aula ong “Ka NEHUTA ka kwah ban pynrem jur ia ki jingkynthoh ba khlem ka jingkitkhlieh bad da ka jingthmu sniew ban pynjah burom ia ka NEHUTA, ia baroh ki kynhun kiba don ha NEHU bad ka Jylla Meghalaya baroh kawei. U Prof Shukla ula pyrshang ban kynnoh ia ki Nonghikai ka NEHU, ka kam ka bym lah ban pdiang satia bad kumta kane kala pynbor ia ka Seng ban kylli ia ka kyrdan pule u Prof Shukla”.
“Ka long kaba kongsan ban ong ba kumno u Prof PS Shukla ula shah thung kum u Vice Chancellor da kaba kdat sharud ia kiba bun ki kyrtong kiba kham biang kyrdan. U dei uba la shu thung da ka seng sain pyrthei. Haba u kren halor ka jingtreikam ba mynta jong baroh ki nonghikai, ka long kaba donkam ban pyntip ha ka rynsan paidbah kaei ka synniang jong u ha ka pule dangle bad ki jingwad bniah, ki jingthoh ba u pynih bad kiwei ki kam wadbniah. Kaba pynshaiong ia ngi, katba u Prof Shukla um shym la noh synniang eiei satia, u dang nud pat ban khein poh bad kren bein ia ka synniang ki nonghikai ka NEHU” ula ong.
“Ha kawei ka liang ula kam burom halor ka QS ranking bad ha kawei pat ula khein poh ia ki kam wad bniah (research) bad ka synniang jong ki nonghikai. Ha kine ki palat 3 snem ka jingtrei jong u kum u VC, ym pat ju kynshew eiei ruh em ban kyntiew ia ka pule dangle ne ka kam wad bniah bad um pat ju wanrah pisa ruh laitnoh tang ka jingkren jali jaum ban leh ia ki kam wadbniah bad ban kyntiew ia ka pule dangle hapoh ka skulbah” ula ong.
“U VC ba shut hung da ka seng sain pyrthei kum u Prof PS Shukla kala pynhiar dor ia baroh ki kynhun kiba don hapoh ka skulbah bad ia baroh ki kam pule dangle, ki kam wadbniah, ka jingkit khlieh ha ka liang ka pisa tyngka bad ka jingpyniaid kam, kaba lam sha kine ki kynrum kynram kiba pynlong ia ki samla pule, ki nonghikai bad ki nongtrei lem bad ki riew paidbah ba kin shim ia ka lynti ban ieng pyrshah bad iakhih bad pynba ruh ia ki kum u briew bym lah pdiang shuh ban wan ha NEHU bad ha Meghalaya” ula bynrap.
Une u Nongialam ka NEHUTA ula ong “Ka dei namar ka jingbym sngewthuh jong u bad ka jingbym nang ban tehlakam ia ka jinglong jingman kumba paw na ki jingkynthoh lamwir ba kynnoh ia ki nonghikai bad kiwei kiwei halor ka jinghiar kyrdan ha ka NIRF bad ka jingbym leh eiei ia ki jingdawa ki samla pule ban weng noh ia ki Ophisar bym larkar kum u Registrar bad Deputy Registrar, b aka jingshah thngan kala wan jia”.
Ula bynrap “Ka dei namar ka jingmynthi bad ka jingsngew baheh ban shu sngap jar ba ka jinglong jingman kala nang heh shaduh une u pud bad ban buhrieh iala ka jong ka jingbym larkar, ula shim ia ka lynti ban kynnoh da kaba pynlong sohpdung ia ki nonghikai, ki samla pule, ki nongtrei bad ki seng jong ki, kiba dei ki seng kiba kongsan ban mihkhmat ia ki kynhun kat kum ka NEHU Act kaba la mynjur da ka Parliament”.
Une u President ka NEHUTA ula pynpaw ruh ba u VC ula kloi ban pynpaw ia ka jingkwah ban wan phai biang wat hapdeng ka jingiaid ka jingtohkit haba ka Committee bala thung da ka Ministry ka dang bishar ia ki kam ka NEHU bad kan dang ban aiti ia ka kaiphod.
 bad ka synniang jong ki nonghikai. Ha kine ki palat 3 snem ka jingtrei jong u kum u VC, ym pat ju kynshew eiei ruh em ban kyntiew ia ka pule dangle ne ka kam wad bniah bad um pat ju wanrah pisa ruh laitnoh tang ka jingkren jali jaum ban leh ia ki kam wadbniah bad ban kyntiew ia ka pule dangle hapoh ka skulbah” ula ong){kind=link}