Shillong, Naiwieng 27: Ka Meghalaya Pavilion ka la ïoh ïa ka takma rupa napdeng ki Jylla bad Union Territory halor ka jingtbit ha ka jingpyni nam ha ka 43rd India International Trade Fair (IITF) 2024 kaba la pynlong da ka India Trade Promotion Organisation (ITPO) hynne ka sngi Balang ha Bharat Mandapam, New Delhi.
Ïa kane ka khusnam la pdiang da u WG Momin u Meghalaya Pavilion Director na ka bynta ka Directorate of Information and Public Relations ha ka jingïadon lang u Bah SL Mawlong PRO ka DIPR, u BF Sun Functional Manager, Nongstoiñ bad u AD Shira uba long u Functional Manager, Ampati naka tnat Commerce and Industries.
Ïa kane ka khusnam la aiti da u Pradeep Singh Kharola u Chairman bad Managing Director ka ITPO uba la long u kongsan ha kane ka sngi.
Lah ban kdew ba ïa ka IITF la pynlong da ka ITPO naduh ka 14 tarik haduh ka 27 tarik Naiwieng halor ka phang, “Viksit Bharat @2047” kaba ïahap bad ka jingthmu jong ka India ban long ka Ri kaba kiew shakhmat, kaba pynpaw ïa ka jingkiew shaphrang, ka jingpynmih thymmai bad ka pateng tynrai.
Ha kane ka Trade Fair la ïashim bynta da ki Jylla bapher bapher, ki Union Territory, ki Ministry bad ki Private Enterprises na kylleng ka ri India.
Ki tnat kiba mihkhmat ia ka jylla Meghalaya ha ka IITF 2024 ki long ka tnat Tourism, Commerce and Industries, Meghalayan Age Limited New Delhi bad ka Directorate of Information and Public Relations.
Nalor ki tnat Sorkar, kila don 8 tylli ki unit kiba la kyrshan da ka Directorate of Commerce and Industries kiba la shim na ki bynta bapher bapher jong ka Jylla ki la ïashim bynta ha kane ka iew ban pyni bad pynïaid iew ïa ki mar tynrai.
